«Քաղաքականությունը մրցակցություն է, որը բաց է մասնակցության համար: Թաթոյանը տանում է Էդմոն Մարուքյանի թեզի՞ն: Քաղաքականությունը հո հացի հե՞րթ չի, որ զիջենք»,- Aysor.am-ի հետ զրույցում ասաց ՀՀԿ գործադիր մարմնի անդամ Էդուարդ Շարմազանովը՝ մեկնաբանելով «Միասնության թևեր» շարժման ղեկավար Արման Թաթոյանի պնդումները, թե պաշտոնաթող նախագահները, «եթե իսկապես ուզում են, որ Նիկոլ Փաշինյանը պարտվի, ապա չպետք է մասնակցեն 2026 թվականի ընտրապայքարին»:
«Եթե Սերժ Սարգսյանը չի մասնակցում, այսինքն, ՀՀԿ-ն չլինի՝ Շարմազանովը, Արմեն Աշոտյանը, Հայկ Մամիջանյանը, Աննա Մկրտչյանը… չլինեն, բա ո՞վ լինի: Նրանք, ովքեր 2018-ին այս մարդկանց հետ ջերմ հարաբերությունների մե՞ջ են եղել:
Եթե Թաթոյանը ժողովրդավարության արժեքների կրող է, թող բոլորն էլ մասնակցեն, տեսնենք՝ ով, ում ինչքան է վստահում: Այս ջերմոցային պայմաններում՝ դու մի մասնակցի, նա չմասնակցի… ես նախապայմաններով քաղաքականության գործընթացներին դեմ եմ, բոլորն էլ թող մասնակցեն՝ Նիկոլն էլ, Պողոսն էլ, ի՞նչն է խնդիրը»,- ասաց Շարմազանովը:
Թաթոյանի մեկ այլ դիտարկմանն էլ, թե Հայաստանի ներքաղաքական կյանքը «վերածված է մրցավազքի նախկինների և Փաշինյանի միջև», իսկ «երբ ընտրությունը և մրցավազքը Փաշինյանի և նախկին նախագահների միջև է, ապա Փաշինյանը միշտ հաղթելու է», Էդուարդ Շարմազանովն այսպես արձագանքեց.
«Դու էլ այնքան եղիր, որ Փաշինյան ու նախկիններ չլինեն, լինի Փաշինյան ու Թաթոյան: Ինքը ի՞նչ է՝ ապագա՞ն է»:
Շարմազանովը նկատեց, որ «ներկա- նախկիններ» թեզը փաշինյանական արհեստական թեզ է.
«Ինձ համար կա բաժանում՝ ազգային- ապազգային, պետականամետ- ապապետականամետ, պրոհայկական-պրոադրբեջանական, Անկախության հռչակագրի ջատագով-Հայաստանի ադրբեջանացման ջատագով: Ի՞նչ է նշանակում՝ սա չմասնակցի, նա չմասնակցի: Այսինքն՝ նախկին նախագահները չմասնակցեն, ռեսուրսը տան Թաթոյանին, ասեն՝ գնա, մասնակցի՞ ...»:
Էդուարդ Շարմազանովը նաև հիշեցրեց՝ նախկին 3 նախագահներն էլ հաղթանակի խորհրդանիշ են.
«Իսկ բոլոր նրանք, որ նախկին -ներկա արհեստական բանավեճի մեջ են, սպասարկում են նիկոլական օրակարգը»:
