Երևանը կանգնած է էկոլոգիական աղետի շեմին. Հենրիխ Դանիելյան

«Սիրելի ընկերներ,

Շատ հաճախ մենք խոսում ենք Երևանի էկոլոգիական աղետի մասին, և դուք հաճախ հարցնում եք՝ ինչպե՞ս կարելի է լուծել այս խորացող խնդիրը։

Ուզում եմ ներկայացնել ձեզ իմ պատկերացումները՝ շատ պարզ ծրագիր, որը իրենից ներկայացնում է Երևանի էկոլոգիական վերածննդի ճանապարհային քարտեզը՝ հիմնված քաղաքական, ռազմավարական և կիրառելի լուծումների վրա՝ միջազգային լավագույն փորձի հիմքով։

Միաժամանակ հիշեցնեմ, որ 2018-ից ի վեր Հայաստանի պետական պարտքը աճել է ավելի քան 7 միլիարդ դոլարով, սակայն այդ գումարներով որևէ շոշափելի բարեփոխում քաղաքում չի իրականացվել։ Դրա փոխարեն բնապահպանական խնդիրները սրվել են։

Երևանը կանգնած է էկոլոգիական աղետի շեմին։

Օդի աղտոտվածությունը, բարձր փոշու մակարդակը, կանաչ տարածքների ոչնչացումը և ավտոպարկի հնացումը լրջորեն վտանգում են երևանցիների առողջությունը և կյանքի որակը։

Ժամանակն է գործելու։ Այժմ պետք է Երևանը վերադարձնել իր առողջ, կենսունակ և բարեկեցիկ տեսքին՝ առաջնորդվելով Ցյուրիխի, Օսլոյի, Վանկուվերի և Սինգապուրի քաղաքային զարգացման լավագույն օրինակներով։

Երևանի էկոլոգիական վերածննդի քայլերը

1. Փողոցների համակարգային մաքրում և ջրման գործարկում

• Ամենօրյա մաքրում և փոշու վերահսկում՝ վակուումային և բարձր ճնշման տեխնիկայով։

• Պետք է ձեռք բերել առնվազն 25–30 ժամանակակից մեքենա։

• Ծախս՝ 2,000,000 ԱՄՆ դոլար

2. Զանգվածային կանաչապատում

• Ծառատունկ՝ բակերում, ճանապարհների եզրերին, բարձունքներում։

• «Կանաչ տանիքներ» և «կանաչ պատեր»՝ ինչպես Սինգապուրում։

• Ծախս՝ 5,128,205 ԱՄՆ դոլար

3. Շինարարական փոշու վերահսկողություն

• Խիստ նորմեր շինհրապարակների համար՝ ջրում, փոշու հսկում։

• Քաղաքապետարանի վերահսկողություն։

• Ծախս՝ նվազագույն կամ զրոյական (պահանջում է իրավական կարգավորում)

4. Քարափոր և բետոնային արտադրանքի հսկողություն

• Պարտադիր՝ փակ տարածքներ, մոնիտորինգ, ջրում, փոշու կլանում։

• Ծախս՝ արտադրողների հաշվին, պետական բյուջեից՝ զրոյական

5. Ավտոպարկի արդիականացում

• Քաղաքի կենտրոնը դարձնել էկոլոգիապես մաքուր գոտի։

• Արգելել Euro 5-ից ցածր մեքենաներ։

• Գնել 100 էլեկտրոբուս։

• Ծախս՝ 12,820,512 ԱՄՆ դոլար

6. Օդի որակի մոնիտորինգ

• Տեղադրել առնվազն 50 չափիչ կայան։

• Տվյալները՝ հանրային։

• Ծախս՝ 100,000 ԱՄՆ դոլար

Ընդհանուր ծախսերի ամփոփում (2 տարով)

Փողոցների մաքրում և տեխնիկա 2,000,000 $

Զանգվածային կանաչապատում 5,128,205 $

Էլեկտրոբուսների գնում և երթևեկության կանոնակարգում 12,820,512 $

Օդի որակի մոնիտորինգ 100,000 $

Շինհրապարակների հսկողություն Նվազագույն կամ զրոյական

Ընդհանուր 20,048,717 ԱՄՆ դոլար

Երևանը այլևս չի կարող սպասել։ Քաղաքի բնապահպանական վերականգնումը պետք է դառնա պետական և համայնքային քաղաքականության առաջնահերթություն։

Անհրաժեշտ է նոր որակի կառավարում, որը չի առաջնորդվում շահույթով, այլ՝ երևանցու կյանքի և առողջության նկատմամբ պատասխանատվությամբ։

Բնապահպանությունը սկսվում է որոշումներից, ոչ թե սին խոսքերից։

Հ.Գ. Այս ծախսերը կազմում են տարեկան ընդամենը 10,000,000 ԱՄՆ դոլար, մինչդեռ ՔՊ-ի իշխանության ընթացքում արտաքին պարտքը ավելացել է շուրջ 7 միլիարդ դոլարով։ Եթե այդ գումարն օգտագործվեր արդյունավետ, ապա կարելի էր նման ծավալի ծախսերով վերականգնել և սպասարկել Երևանը 700 տարի շարունակ»։