Արմավիրի մարզպետ Վահրամ Խաչատրյանը վստահեցնում է՝ Մերձավանում կատարված սպանությունները քաղաքական պատվեր չեն։
«Կպարզվի, մեղավորները պատասխան կտան», - լրագրողների հետ զրույցում ասաց նա։
Մարզպետը նշեց, որ Վալոդյա Գրիգորյանն իր լավ ընկերն է եղել։
Հարցին՝ իրեն պատասխանատու զգո՞ւմ է մարզում տիրող իրավիճակի համար՝ ասաց. «Այո՛, իհարկե»։
Խաչատրյանը նշեց, որ գնացել է Մերձավան, հանդիպել Վալոդյա Գրիգորյանի ընտանիքին։
Հիշեցնենք՝ սեպտեմբերի 23-ին՝ ժամը 23.52-ին, ՆԳՆ ոստիկանություն ահազանգ է ստացվել, որ Արմավիրի մարզի Մերձավան բնակավայրի Երևանյան խճուղում կրակոցներ են հնչել։
Մահացածներից մեկը Փարաքար համայնքի ղեկավար Վալոդյա Գրիգորյանն է, երկրորդ զոհը քրեական ոստիկան Կարեն Աբրահամյանն է:
ՆԳՆ մամուլի խոսնակ Նարեկ Սարգսյանը հայտնել է, որ ոստիկանը ծառայության մեջ չի եղել, պարզապես այդ պահին Վալոդյա Գրիգորյանի հետ է եղել. նրանք ընկերական հարաբերություններ են ունեցել:
Մերձավանի կրակոցների և սպանությունների դեպքի առթիվ նախաձեռնվել է քրեական վարույթ։
Նշենք, որ վիրավորում էր ստացել նաև նրանց հետ գտնվող երրորդ անձը, որը վիրահատվել է, կյանքին վստանգ չի սպառնում։
