Սամվել Կարապետյանի զորակցությունը Մայր Աթոռ Սուրբ Էջմիածնին այսօր վերածվեց քաղաքական հետապնդումների, որոնք իրենց մեջ կրում են իշխանությունների վերաբերմունքը, դատարանի բակում լրագրողներին ասաց Ռուսաստանի և Նոր Նախիջևանի թեմի առաջնորդ Եզրաս արքեպիսկոպոս Ներսիսյանը։
Սրբազան Հայրը նշեց, որ հոգևորականներն այսօր դատարանի բակում են՝ զորակցություն բերելու բարերար Սամվել Կարապետյանին։
Եզրաս արքեպիսկոպոս Ներսիսյանը նշեց, որ Սամվել Կարապետյանը հավատարիմ է ազգային արժեքներին, ժողովրդին ու պետականության շահերին՝ հակառակ ամեն տեսակ փորձության։
Եզրաս Սրբազանը զերծ մնաց գնահատական տալ՝ արդյո՞ք Նիկոլ Փաշինյանը պատերազմ է հայտարարել եկեղեցուն։
«Ես այստեղ եմ, որ փոխանցեմ ռուսաստանաբնակ հարյուր հազարավոր հայորդիների զորակցությունը, Ռուսաստանի և Նոր Նախիջևանի հայոց թեմի բարեպաշտ հայորդիների աղոթական զորակցությունը, նվիրումն ու հավատարմությունը»,- ասաց Սրբազան Հայրը՝ նշելով, որ ցանկացած երկիր ուրախ պետք է լիներ, որ ունի Սամվել Կարապետյանի նման զավակ։
