«Առնվազն մեկ ձայնագրության շուրջ մենք ֆիքսել ենք, որ ձայնագրությունն ու սղագրությունը կեղծված են։ Ենթադրում եմ, որ եթե գնար փորձագետների մոտ, գուցե շատ ավելի կեղծիքներ կարող էին բացահայտվել»,- ասուլիսում ասաց Բագրատ Սրբազանի փաստաբան Հովհաննես Խուդոյանը:
Նա հարցադրում արեց՝ ի՞նչ պետք է լիներ պատշաճ քննության պարագայում ցանկացած գործով, որտեղ կան ձայնագրություններ. «Պետք է նշանակվեր մի քանի տեսակի փորձաքննություն, ընդհանուր առմամբ՝ համալիր փորձաքննություն: Նախ պետք է պարզվեր՝ աուդիոֆայլերն ամբողջակա՞ն են, թե՞ ոչ, ստեղծված են այն ժամանակաշրջանում, որին վերագրվո՞ւմ է, թե՞ ոչ, ամբողջակա՞ն են, մոնտաժված չե՞ն, հստա՞կ են, այլ ձևափոխման ենթական չե՞ն, որևէ տեսակի միջամտություն չկա՞: Դրանից հետո պետք է նույնականացվեր անձանց ձայները և վերջնական, փորձագետն ինքը պետք է հաստատեր բոլոր դիալոգների իրականությունն ու անձանց մասնակցությունը»։
Փաստաբանն ընդգծեց, որ Բագրատ Սրբազանի գործով որևէ փորձաքննություն չկա արված. «Ստացվում է օդում մեկի, ինչ-որ պաշտնատար անձի ենթադրած՝ ով ինչ է խոսում, դրա վերաբերյալ որևէ ապացույց չկա»։
«Սա տեսական դատողություն չէ, որ ասում ենք՝ կարող է այս ձայնագրությունները խնդիր ունենան, կեղծված լինեն և այլն: Մեր մտահոգությունն այն է, որ պրակտիկայում տեսել ենք, ոնց են այդ փաստերով մանիպուլյացիայի ենթարկել»,-ասաց Հովհաննես Խուդոյանը:
Մանրամասն՝ տեսանյութում։
