Բարերար, գործարար Սամվել Կարապետյանի եղբորորդին՝ «Ուժեղ Հայաստան» կուսակցության խորհրդի անդամ Նարեկ Կարապետյանը, վկայակոչելով ամերիկյան Forbes պարբերականի 2026 թվականի տվյալները՝ տեղեկացրել է, որ Սամվել Կարապետյանի կարողությունը 1 տարվա ընթացքում աճել է 900 մլն դոլարով՝ կազմելով 4.1 մլրդ ԱՄՆ դոլար:
«Շատ գիտե՞ք մարդ, ով կալանքի տակ հաջողել է համարյա 1 մլրդ դոլարով կարողություն ավելացնել: Պատկերացրեք՝ որտեղ կբարձրացնի երկրում ապրելու մակարդակը, երբ լինի Հայաստանի վարչապետը: Փոփոխության ժամանակն է»,- ֆեյսբուքյան էջում գրել է նա:
Հիշեցնենք, որ Սամվել Կարապետյանը կալանքի տակ է գտնվել 2025թ.-ի հունիսի 18-ից. նա մեղադրվում է իշխանությունը զավթելու հրապարակային կոչերի մեջ: Դա տեղի ունեցավ այն բանից հետո, երբ Կարապետյանը հայտարարեց, որ միշտ եղել է Հայ եկեղեցու և հայ ժողովրդի կողքին, և եթե քաղաքական գործիչները հաջողության չհասնեն, ապա «մենք պատրաստ ենք մեր ձևով մասնակցել այդ ամենին»:
Ավելի ուշ նրան մեղադրանք առաջադրվեց նաև տնտեսական բնույթի հանցագործություններ կատարելու համար (առանձնապես խոշոր չափերով հարկերից խուսափում և փողերի լվացում): Կարապետյանը չի ընդունում իրեն առաջադրված մեղադրանքների բոլոր դրվագները։ Նրա պաշտպանները, թիմակիցները, ընդդիմադիր քաղաքական շրջանակը Սամվել Կարապետյանին քաղբանտարկյալ են համարում:
Հունվարի 17-ին «Տաշիր» ընկերությունների խմբի հիմնադիր Սամվել Կարապետյանի նկատմամբ կալանքը որպես խափանման միջոց ընտրելու միջնորդությունը մերժվեց, կիրառվեց տնային կալանք:
