«ՀայաՔվե» ազգային քաղաքացիական նախաձեռնությունը Սուրբ Աննա եկեղեցու դիմաց ակցիա է կազմակերպել՝ հաջակցություն Ծաղկազարդի օրը եկեղեցում Նիկոլ Փաշինյանի անվտանգության աշխատակցի կողմից բռնության ենթարկված և հետագայում կալանավորված Դավիթ Մինասյանի։
Ակցիային մասնակցող երիտասարդները խորհրդանշական քայլ են կատարել՝ կապել են իրենց ձեռքերը՝ այդ կերպ իրենց բողոքը հայտնելով դպրոցական տղայի ապօրինի կալանքի դեմ։
«Մենք բոլորս Դավիթ ենք»,- ասում են նրանք՝ ընդգծելով, որ երկրում գործող իշխանության ստեղծած պայմաններում իրենցից յուրաքանչյուրը կարող է լինել հաջորդը՝ կալանավորվել չկատարած հանցանքի համար, ինչպես այսօր Դավիթ Մինասյանն է կալանքի տակ գտնվում։«Եկել ենք պաշտպանելու Դավիթ Մինասյանի իրավունքները, պայքարելու նրա ազատության համար։ Նա ոչ մի մեղք չի գործել, ընդամենը մասնակցել է պատարագի, և Ծաղկազարդի գեղեցիկ տոնը նրա ընտանիքի համար վերածել են դժբախտության։
Դավիթ Մինասյանին հայտնում ենք մեր աջակցությունը, կանգնում ենք նրա ընտանիքի կողքին»,- ասում են ակցիայի մասնակիցները։
«Երիտասարդներն են ապագա տերը Հայաստանի, մենք չենք կարող անտարբեր մնալ կատարվողի նկատմամբ»,- ընդգծում են նրանք։
