Կարգալույծ հռչակված Ստեփան Ասատրյանը, ով կիրակի օրը Հովհաննավանքում «պատարագ» էր մատուցել, տեղյակ չի, թե ովքեր են իր հետ այդ օրը եկեղեցում ծառայություն իրականացրել, մասնավորապես, դպիրներից Ռաֆայելին չէր ճանաչում։
«Չեմ ճանաչում»,- Aysor.am-ի հետ զրույցում ասաց նախկին հոգևորականը։
«Բա դուք պատարագ եք մատուցում, չգիտե՞ք՝ ովքեր են Ձեզ հետ այդ օրը ծառայություն իրականացնում»,- հետաքրքրվեցինք Ստեփան Ասատրյանից։
Նա էլ ասաց, թե ինքը մարդկանց չի կանչում եկեղեցի, որ իմանա նրանց կուսակցությունները։
«Եկեղեցին վերքաղաքական կառույց է ու իր հավատացյալների կուսակցական կողմնորոշումն իրեն, առհասարակ, չպետք է հետաքրքրի»,- հավելեց Ստեփան Ասատրյանը։
Նշենք, որ համացանցում տարածվել էր Հովհաննավանքում կիրակի օրվա «պատարագին» մասնակցած դպիրներից մեկի լուսանկարը, նշվում էր, թե նա «կեղծ դպիր է»։
Պարզվում է՝ երիտասարդը ՔՊ-ական է, բայց «կեղծ դպիր» լինելու փաստը «Քաղաքացիական պայմանագիր» կուսակցության փոխնախագահ Վահագն Ալեքսանյանը հերքել է։
Նա նշել էր, որ Ռաֆայելը որպես դպիր ձեռնադրվել է 2018 թվականի դեկտեմբերի 25-ին՝ Արարատյան Հայրապետական Թեմի առաջնորդական փոխանորդ Նավասարդ արքեպիսկոպոս Կճոյանի կողմից։
Նշենք, որ երեկ Մայր Աթոռի տեղեկատվական համակարգի տնօրեն Տեր Եսայի քահանա Արթենյանն Aysor.am-ին ասել էր, որ այդ «պատարագին» մասնակից սարկավագները Մայր Աթոռի միաբան չեն։
Հիշեցնենք՝ հոկտեմբերի 26-ին Ստեփան Ասատրյանը Հովհաննավանքում կեղծ պատարագ մատուցեց, որին ներկա էին վարչապետ Նիկոլ Փաշինյանն ու մի խումբ ՔՊ-ականներ։
Ըստ Փաշինյանը՝ դա «նորոգման պատարագ էր»։ Նա հայտարարել էր, թե Հովհաննավանքի «պատարագը» խորհրդանշելու է Մայր Աթոռ Սուրբ Էջմիածնի ազատագրման գործնական փուլի մեկնարկը։
Մայր Աթոռի կողմից «պատարագն» անօրինական է ճանաչված։
