Մետրոյի «Աջափնյակ» կայարանի նախագիծը բաժանվել է երեք փուլի՝ «Բարեկամություն»-ից մինչև կիրճ գտնվող թունելային հատվածի կառուցում, կամուրջի կառուցում ու կամուրջից թունել՝ դեպի կայարան ու բուն կայարանի կառուցում, կառավարության այսօրվա նիստում հայտարարեց Երևանի քաղաքապետ Տիգրան Ավինյանը։
«Կհայտարարենք մրցույթներ, կտեղեկացնենք բոլոր խոշոր ընկերություններին, որ մասնակցեն մրցույթներին, կունենանք հաղթող ու հաջորդ իսկ քայլով կքննարկենք ֆինանսական միջոցների տրամադրման հարցը»,- ասաց նա։
Ավինյանը վստահեցրեց, թե 2026 թվականին կարող են «Աջափնյակ» կայարանում սկսել աշխատանքները։
«Կայարանի կառուցումից հետո Երևանի մետրոպոլիտենում ուղևորահոսքի աճը կլինի մոտ 25 տոկոս»,- նշեց նա։
Նիկոլ Փաշինյանն էլ ասաց, թե մետրոյի «Աջափնյակ» կայարանի կառուցումը շատ կարևոր է։
«Տեսեք, մենք երկու րոպեում սա նկարագրեցինք, 15 րոպեից սկսելու են ասել՝ «բա ո՞ւր է, ինչո՞ւ չկառուցվեց, ասացին՝ չարեցին», և այլն։ Ես ուզում եմ՝ մենք հասկանանք, որ մեր պետությունն իր գոյության ողջ ընթացքում նման մասշտաբի ծրագրեր չի իրականացրել, նույնիսկ ամենաարագ գործող տեղերում այս ծրագրերը նման արագությամբ չեն իրականացվում»,- հայտարարեց Փաշինյանը։
