Փաստաբան Սոս Հակոբյանը հայտնել է, որ Գյումրու ավագանու «Մեր քաղաքը» դաշինքի անդամ Կարեն Բադալյանի լիազորությունները ԸԸՀ-ն դադարեցրել է, մանդատը փոխանցվել է «Մեր քաղաքը» դաշինքի հաջորդ համարին՝ Նարեկ Միրզոյանին։
«Քիչ առաջ շատ կարևոր հաղթանակ արձանագրվեց Գյումրիում:
Առավոտյան մեր կողմից լայնորեն բարձրացված հարցը ունեցավ հանգուցալուծում. տարածքային ընտրական հանձնաժողովը ավագանու անդամի մանդատը հանձնեց «Մեր քաղաքը» դաշինքի հաջորդ համարին՝ Նարեկ Միրզոյանին»․
Դրանից առաջ «Մեր քաղաքը» խմբակցության արդեն նախկին ավագանու հրաժարականի փաստը օրենքի կոպիտ խախտմամբ տարածքային ընտրական հանձնաժողովը հրաժարվում էր արձանագրել: Լրացել էին օրենքով սահմանված բոլոր հնարավոր ժամկետները:
Հնչեցին ամենատարբեր արդարացումներ, «դե, մենք իրավաբան չենք...» ոճի մեջ...
Այսօրվա տեղական ժողովրդավարության փոքրիկ, բայց կարևոր հաղթանակը բոլորինս է:
Ասածս ուժի մեջ է. բոլորը պատասխան են տալու իրենց արածի և չարածի համար օրենքով սահմանված կարգով և խստությամբ»,- սոցցանցի իր էջում գրել է փաստաբանը:
Հիշեցնենք՝ ԸԸՀ-ն չէր շտապում «Մեր քաղաքը» դաշինքի ընտրացուցակի հաջորդ անդամին հանձնել մանդատը, ինչի մասին էլ այսօր բարձրաձայնել էր փաստաբան Սոս Հակոբյանը։ Ահազանգից ժամեր անց միայն մանդատը փոխանցվեց նույն դաշինքի անդամին։
