Ռուսաստանի նախագահ Վլադիմիր Պուտինը հայտարարել է, որ Ռուսաստանի Դաշնությունը «մի փոքր նախանձում է», որ Չինաստանը վերջին տարիներին բեկում է կատարել, որն իրական հետաքրքրություն է առաջացրել ամբողջ աշխարհում։ Այս մասին նա ասել է Չինաստանի նախագահ Սի Ծինփինի հետ հանդիպման ժամանակ։
«Վերջին տարիներին Չինաստանը հսկայական թռիչք է կատարել իր զարգացման մեջ: Ամբողջ աշխարհում սա իսկապես հետաքրքրություն է ներկայացնում, և մենք նույնիսկ մի փոքր նախանձում ենք ձեզ»,- ասել է ՌԴ նախագահը:
Պուտինը նշել է, որ Չինաստանը ստեղծել է տնտեսության զարգացման և պետության հզորացման համակարգ, որն ավելի արդյունավետ է, քան աշխարհի շատ այլ երկրներում։ Ռուս ղեկավարի խոսքով՝ դա ակնհայտ փաստ է։
Իր հերթին Սի Ծինփինը նշել է, որ ռուսները կաջակցեն Վլադիմիր Պուտինին 2024 թվականին կայանալիք նախագահական ընտրություններում։ «Վստահ եմ, որ ռուս ժողովուրդը կաջակցի ձեզ»,- ասել է Չինաստանի ղեկավարը։
ՌԴ նախագահ Վլադիմիր Պուտինի հրավերով Սի Ծինփինի պետական այցը Ռուսաստան կտեւի մարտի 20-ից 22-ը։
