Կորոնավիրուսի դեմ Օքսֆորդի համալսարանի մշակած պատվաստանյութը բարձր արդյունավետություն է ցույց տվել

Օքսֆորդի համալսարանի մասնագետների մշակած պատվաստանյութը կորոնավիրուսի դեմ լայնամասշտաբ փորձարկումների ընթացքում ստացված տվյալերի համաձայն՝ բարձր արդյունավետություն է ցույց տվել:

Ինչպես փոխանցում է BBC News-ը, միջանկյալ տվյալները ցույց են տվել, որ պատվաստանյութի շնորհիվ մարդկանց օրգանիզմում դադարում են զարգանալ «Քովիդ-19»-ի ախտանշանները: Այն 70 տոկոսով պաշտպանություն է ապահովում, սակայն հետազոտողների խոսքով՝ վերջնական արդյունքում այդ ցուցանիշը կարող է հասնել 90 տոկոսի՝ դեղաչափի շտկման միջոցով:

Աղբյուրը հիշեցնում է, որ ամերիկյան Pfizer և Moderna ընկերությունների ստեղծած պատվաստանյութերը կլինիկական փորձարկումների արդյունքում 95 տոկոս պաշտպանություն են ցույց տվել:

Համեմատելով ամերիկյան և բրիտանական պատվաստանյութերը՝ պարբերականն ընդգծում է, որ Օքսֆորդի առաջարակած տարբերակն ավելի մատչելի կլինի, և այն հեշտ կլինի պահեստավորել՝ աշխարհի տարբեր անկյուններ հասցնելու համար:

Բրիտանական կառավարությունը 100 մլն դեղաչափի նախնական պատվեր է տվել: AstraZeneca ընկերությունից, որը համագործակցում է Օքսֆորդի համալսարանի հետ, հայտնել են, որ հաջորդ տարի 3 մլրդ դեղաչափ կարտադրի ողջ աշխարհի համար: