Ուրբաթ Պակիստանի Կարաչի քաղաքում Pakistan International Airlines ավիաընկերության Airbus А320 ուղևորատար ինքնաթիռի կործանման հետևանքով զոհվել է 97 մարդ։ Ավիավթարի 2 փրկված ուղևորներից մեկը՝ Մուհամադ Զուբաիրը, ավիավթարից մանրամասներ է պատմել, գրում է BBC-ն։
Միայն աննշան վնասվածքներ ստացած Մուհամադ Զուբաիրը հայտնել է, որ ինքնաթիռը փորձել է վայրէջք կատարել և 10-15 րոպե անց՝ առաջին իսկ վայրէջքի փորձի ժամանակ, վթարի է ենթարկվել: Երեկ որոշ լրատվամիջոցներ հայտնել էին, որ ինքնաթիռը կործանվել է վայրէջքի 4-րդ փորձի ժամանակ:
«Ոչ ոք չգիտեր, որ ինքնաթիռը կործանվելու է, նրանք ինքնաթիռը սահուն ու հանգիստ էին վարում»,- ասել է նա:
Վթարից հետո տղամարդը կորցրել է գիտակցությունը։
«Բոլոր կողմերից բղավոցներ էի լսում․ երեխաների ու մեծահասակների։ Շուրջբոլորս միայն կրակ էի տեսնում։ Ոչ ոքի չէի կարողանում տեսնել, միայն նրանց բղավոցներն էի լսում»,- պատմել է տղամարդը։
«Ես բացեցի անվտանգության գոտին և լույսի նշույլ տեսա ու գնացի այդ ուղղությամբ։ Ես ստիպված էի ցած նետվել մոտ 3 մետր բարձրությունից, որպեսզի անվտանգ վայր հասնեմ»,- հավելել է նա։
Փենջաբի բանկի նախագահ Զաֆար Մասուդը երկրորդ ուղևորն է, որը ողջ է մնացել ավիաաղետից, հայտնել է նահանգի կառավարության ներկայացուցիչը: Երկուսն էլ օդանավի առջևի մասում են նստած եղել։ Կան հաղորդումներ այլ վերապրածների մասին, սական այդ տեղեկությունները չեն հաստատվել:
«Շատ շնորհակալ եմ: Աստված ողորմած գտնվեց իմ հանդեպ»,- ասել է Մասուդը։
Հիշեցնենք, որ «Պակիստանի միջազգային ավիաուղիներ» ավիաընկերությանը պատկանող ինքնաթիռը ներքին չվերթ էր իրականացնում՝ Լահորից դեպի Կարաչի: Geo TV-ի տվյալներով՝ ինքնաթիռը վթարի է ենթարկվել Կարաչիի օդանավակայանի մոտակայքում՝ վայրէջքից մեկ րոպե առաջ:
Ականատեսների տեսանյութերից դատելով՝ ինքնաթիռն ընկել է բնակելի շրջանում:
Նշվում է, որ օդաչուն ավիադիսպետչերին նախքան կործանումը հայտնել է, որ ինքնաթիռի շարժիչները շարքից դուրս են եկել։
Տեղական իշխանությունների տվյալներով՝ հաստատվել է 97 մահ, թեև պարզ չէ, թե զոհերից քանիսն են եղել ուղևորներ և քանիսը՝ բնակիչներ։
