Մեզ համար անընդունելի է մարզպետների նման պարգևավճարների տրամադրումը: Լրագրողների հետ ճեպազրույցում ասաց «Լուսավոր Հայաստան» խմբակցության պատգամավոր Անի Սամսոնյանը՝ անդրադառնալով մարզպետների կողմից հատկացված պարգևավճարներին:
«Վեց-յոթ ամսի աշխատողները չէին կարող այդքան բարձր դրույքաչափերով պարգևավճարներ ստանալ», - նշեց:
Ա. Սամսոնյանը նշեց նաև, որ քաղաքապետարանում ևս նման պարգևատրումներ եղել են ու քաղաքապետ Հայկ Մարությանը չի ցանկացել հաշվետվություն ներկայացնել, թե որ աշխատակիցները և ինչքան են պարգևատրվել:
«Եթե հիշում եք, երբ Երևանի քաղաքապետարանում քննարկվում էր պարգևատրումների համար բյուջեի ավելացումը, մենք ասում էինք, որ դա վատ պրակտիկա է, պետք է ավելացնեն աշխատավարձը, և սա սկզբունքային հարց է»,-ասաց նա:
Անի Սամսոնյանը շարունակեց, որ այն կարգադրությունները, որ ընդունել են մարզպետները, անընդունելի են՝ հատկապես հաշվի առնելով նրանց աշխատած ժամանակը` 7 ամիս, 2 ամիս և այլն:
