Ադրբեջանցու կրակոցից վիրավորված Անի Ավետիսյանը վերակենդանացման բաժանմունքից տեղափոխվել է հիվանդասենյակ, սակայն շարունակում է ցավեր ունենալ և պարբերաբար ցավազրկողներ է ընդունում։ Այս մասին 24News-ի հետ զրույցում հայտնել է Անիի ամուսինը։
Նրա խոսքով՝ Անիի առողջական վիճակը դեռևս պահանջում է բժշկական հսկողություն։ Վիրավորումը եղել է ինչպես ոտքի, այնպես էլ ձեռքի հատվածում։
«Վերջին օրերին Անիին վիրահատել են։ Վիրահատական միջամտության ընթացքում կատարվել է մատի անդամահատում, ինչպես նաև՝ ոտքի կրճատում»,- նշել է նրա ամուսինը։
Ընտանիքից հայտնել են, որ առաջիկա հնարավոր վիրահատությունների մասին այս պահին դեռ վաղ է խոսել։ Անիի ամուսինը նաև նշել է, որ այս փուլում ընտանիքը չի ցանկանում կրկին անդրադառնալ դեպքի մանրամասներին։
Դեպքը տեղի էր ունեցել հոկտեմբերի 1-ին Սյունիքի մարզի Սիսիան համայնքի Շաքի բնակավայրում։ Ըստ հաղորդումների՝ ադրբեջանցի զինծառայող Նասիմ Մուսաևը ներթափանցել էր բնակավայր, գիշերել տներից մեկում, ապա կրակել 39-ամյա Անի Ավետիսյանի ուղղությամբ՝ նրան վիրավորելով ոտքի հատվածում։
Անի Ավետիսյանը կարողացել էր դանակով հարվածներ հասցնել Մուսաևին։ Դեպքի հետևանքով վնասվածք էր ստացել նաև նրա 15-ամյա որդին, որը տեղափոխվել էր Սիսիանի բժշկական կենտրոն։
Անի Ավետիսյանը ներկայում բուժում է ստանում Երևանի «Սուրբ Գրիգոր Լուսավորիչ» բժշկական կենտրոնում։
