Խորհրդարանի՝ օգոստոսի 19-ի նիստում քննարկվել է Տարածաշրջանային և եվրասիական ինտեգրման հարցերի մշտական հանձնաժողովի նախագահի ընտրության հարցը։
ԱԺ «Քաղաքացիական պայմանագիր» խմբակցությունը վերոնշյալ հանձնաժողովի նախագահի պաշտոնում ընտրելու համար առաջադրել է Տրդատ Սարգսյանի թեկնածությունը։ Այս մասին հայտնել է խմբակցության ղեկավար Արուսյակ Մանավազյանը։
Թեկնածուի կենսագրական տվյալներն ու աշխատանքային գործունեությունը ներկայացրել է ԱԺ «Քաղաքացիական պայմանագիր» խմբակցության անդամ Արուսյակ Ջուլհակյանը։
Տարածաշրջանային և եվրասիական ինտեգրման հարցերի մշտական հանձնաժողովի նախագահի թեկնածու Տրդատ Սարգսյանը շնորհակալություն է հայտնել «Քաղաքացիական պայմանագիր» կուսակցության վարչությանն ու խմբակցությանը՝ հանձնաժողովի նախագահի պաշտոնում իրեն առաջադրելու համար։ Նա ընդգծել է, որ աշխարհաքաղաքական և տնտեսական փոփոխությունների պայմաններում Հայաստանի բազմավեկտոր քաղաքականությունն ուղղված է տնտեսական զարգացմանն ու անվտանգության ապահովմանը։
Թեկնածուի ներկայացմամբ Հայաստանի արտաքին առևտրաշրջանառությունը 2015 թվականի 4.7 միլիարդ դոլարից 2025 թվականին հասել է 21.4 միլիարդ դոլարի, իսկ ԵԱՏՄ երկրների հետ առևտրաշրջանառությունն աճել է ավելի քան 6 անգամ՝ հասնելով 8.04 միլիարդ դոլարի։
Առաջիկա առաջնահերթություններից Տրդատ Սարգսյանն առանձնացրել է ԵԱՏՄ շուկայում հայկական տնտեսավարողների առջև ծառացած խոչընդոտների վերացումն ու արագ արձագանքման մեխանիզմների ձևավորումը։
Թեկնածուն պատասխանել է պատգամավորների հարցերին։
Եզրափակիչ ելույթում Տրդատ Սարգսյանը պատրաստակամություն է հայտնել աշխատելու ԱԺ բոլոր խմբակցությունների հետ։
Նիստում Հաշվիչ հանձնախմբի նախագահ Լիլիթ Մինասյանը տեղեկացրել է, որ ԱԺ մշտական հանձնաժողովների նախագահների ընտրությունը կկայանա օգոստոսի 20-ին՝ ժամը 10։10-ին և կտևի 2 ժամ։
