Քրեական ոստիկանության թմրամիջոցների անօրինական շրջանառության դեմ պայքարի վարչության ծառայողները ստացած հերթական օպերատիվ տեղեկությունն իրացնելիս համագործակցեցին Քննչական կոմիտեի տնտեսական հանցագործությունների և մաքսանենգությունների քննության գլխավոր վարչության ծառայողների և Երևանի պարեկների հետ։
ՆԳՆ ոստիկանության հաղորդմամբ, հուլիսի 8-ին՝ ժամը 16․50-ին, մայրաքաղաքի Արշակունյաց պողոտայի և Շիրակի փողոցի խաչմերուկում, մաքսանենգ ճանապարհով ներկրված թմրամիջոց ապօրինի ձեռք բերելու, պահելու և իրացնելու կասկածանքով իրավապահները ձերբակալել են և իր վարած «Ֆորդ» մակնիշի մեքենայով հանդերձ Համայնքային ոստիկանության Էրեբունու բաժին տեղափոխել Նոր Նորքի բնակիչ 31-ամյա մի տղամարդու։
Զննությամբ մեքենայում հայտնաբերվել է պոլիէթիլենային փաթեթ, որում կար 10 կիլոգրամ մարիխուանա և մեկ կիլոգրամ 108 գրամ մեթամֆետամին։ Տղամարդն ընդունել է, որ թմրամիջոցները ձեռք են բերվել իրացման նպատակով։
Շարունակելով օպերատիվ-հետախուզական միջոցառումները՝ իրավապահները նույն օրը ձերբակալել են նաև Նոր Նորքի 8-րդ զանգվածի բնակիչ 22-ամյա մի երիտասարդի, որի ուղղորդմամբ էր 31-ամյա տղամարդը վերցրել թմրամիջոցները։
Երկուսն էլ ներկայացվել են նախաքննական մարմին։ Հանգամանքները պարզվում են։
