Մայր Աթոռ Սուրբ Էջմիածնի դիվանապետ Արշակ արքեպիսկոպոս Խաչատրյանի մոտ ծիծաղ է հարուցում իրեն վերագրվող թմրամիջոցի կորել-չկորելու թեման։
«Պատկերացրեք՝ 2018 թվականին քրեական գործ է հարուցվել, դա քննվել է, հետո կարճվել է, հետո 2025 թվականին վերստին բացվում է, այն ժամանակ ինձ հարցաքննել էին, այն ժամանակ որպես վկա էի, հետո մեկ էլ հանկարծ պարզվեց, որ մեղադրյալը ես եմ»,- դատական այսօրվա նիստից հետո լրագրողների հետ զրույցում ասաց Սրբազան Հայրը։
Արշակ Սրբազանն այս ամենը կապում է եկեղեցու դեմ արշավի հետ։
Սրբազան Հայրն ասաց, որ եկեղեցին մեր ազգային ինքնության առանցք է ու իր խորին համոզմունքն այն է, որ եկեղեցին չի կարող ինչ-որ պատահական մարդկանց գործողությունների հետևանքով ոչնչացվել կամ կազմալուծվել։
«Որ որոշակի աշխարհաքաղաքական ասպեկտներ կան եկեղեցու դեմ այս գործողությունների խորքում՝ ակնհայտ է»,- նշեց Մայր Աթոռի դիվանապետը։
Սրբազանը ցավում է եկեղեցու դեմ արշավին միացած տիրադավների համար, նրանց հետ ճանապարհ է անցել ու իր մղձավանջային երազներում անգամ չէր պատկերացնի, որ կհայտնվեին այսպիսի վիճակում։
«Համոզված եմ, որ իրենք էլ իրենց համար նման ապագա չէին կարող կանխագուշակել»,- ընդգծեց Արշակ Սրբազանը։
