Բյուրականի Սուրբ Հովհաննես եկեղեցու քահանա Տեր Վրթանես Բաղալյանի համոզմամբ՝ սեպտեմբերի 16-ին Հանրային հեռուստատեսության եթերում Հովհաննավանքի նախկին հոգևոր հովիվ, ներկայումս կարգալույծ արված Ստեփան Ասատրյանի հայտարարությունը Քննչական կոմիտեում է գրվել:
Հիշեցնենք՝ Ասատրյանը հայտարարել էր, իբրև 2021 թվականին Հայ Առաքելական եկեղեցու ներսում «եղել է պարտադրանք»` քաղաքական ուժերից մեկի նախընտրական հանրահավաքներին մասնակցելու:
«Նիկոլ Փաշինյանը հաձնարարական է տվել Քննչականին, Քննչականը Ասատրյանի հետ կազմել է այդ պատրաստի դժգոհությունը, որի հիման վրա էլ սկսել են ձերբակալությունները: Արագածոտնի թեմի առաջնորդ Մկրտիչ Սրբազանի վրա են փորձում գործ սարքել՝ ներգրավելով այլ հոգևորականների ևս»,-Aysor.am-ին ասաց Տեր Վրթանեսը:
Տեր Վրթանեսի խոսքով՝ գործ սարքելու գործընթացը շարունակվում է, իշխանությունները թիմով են լծված դրան և այլ հոգևորականներ են փնտրում.
«Ստեփան Աստարյանի թիմը աշխատում է մեր թեմից ոմանց վրա գործ սարքի... հազար ամոթ Ստեփանին, որ սուտ վկայություն արեց, հազար ամոթ էն գրանտակեր կեղծ իրավապաշտպանին (Դանիել Իոաննիսյանին-խմբ.) ու այն պաշտոնյաներին, որոնք մինչև ուղնուծուծը խրված են այս ապօրինի գործունեության մեջ: Եթե Նիկոլն այս տեմպով շարունակի, մենք Հայաստանում 9 եպիսկոպոս թեմակալ առաջնորդ ունենք, որից 3-ին բռնել է, երկու տարվա ընթացքում Հայաստանի բոլոր թեմակալ առաջնորդներին բանտում կպահի»:
Հիշեցնենք, որ Ստեփան Ասատրյանի հայտարարությունից հետո Դանիել Իոաննիսյանի կողմից համակարգվող «Իրազեկ քաղաքացիների միավորումն» էր սեպտեմբերի 17-ին հանցագործության մասին հաղորդում ներկայացրել դատախազություն, այդ հաղորդման հիման վրա էլ նախաձեռնել էին քրեական վարույթ, ինչի շրջանակներում 2 ամսով կալանավորել էին նաև Արագածոտնի թեմի առաջնորդ Մկրտիչ Սրբազանին։
