Կապանում սպանված Յուրի Մարգարյանը աշխատում էր Զանգեզուրի կոմբինատում։ ՆԳՆ նախարարի խորհրդականը գնացել է սպանության դեպքի վայր։
Armlur.am-ին Կապանի բնակիչներից հայտնի դարձավ, որ մյուս դանակահարվածը՝ Էդգար Մնացականյանն է, ով աշխատում է Կապանի լեռնահարստացման կոմբինատում։ Ըստ նախնական տեղեկությունների՝ Կապան քաղաքի կաթսայատան տարածքում վերջիններս վիճել են և «ԷՍ ԸՆԴ ԷՅ մայնինգի» աշխատակցի հետ, ով էլ, ըստ նախնական վարկածի, նրանց դանակահարել է։
Մեզ հասած լուրերով՝ ՆԳՆ նախարարի խորհրդական Սևան Քոչարյանը սպանության դեպքով շտապել է դեպքի վայր։ Դատելով վերջին դեպքերից, իրավապահները որոշել են «կաբինետներից» դուրս գալ և առերեսվել իրականության հետ։
Shamshyan.com-ի տվյալներով՝ հիվանդանոց են մեկնել Քրեական ոստիկանության գլխավոր վարչության Սյունիքի մարզային քրեական վարչության պետ Դավիթ Սուրենյանը և ոստիկանության Կապանի բաժնի պետ Համլետ Վասիլյանը։
Տեղում պարզվել է, որ հիվանդանոց տեղափոխվածներն են Սյունիքի մարզի բնակիչներ՝ 37-ամյա Յուրի Մ․-ն, ով ստացել է կրծքավանդակի շրջանի կտրած-ծակած վերք, և 33-ամյա Էդգար Մ․-ն, ով ստացել է աջ ազդրի կտրած-ծակած վերք։ Մահացածը Յուրի Մ․-ն։
ՆԳՆ-ն պաշտոնապես հայտնեց, որ Կապանում կատարված հանցագործությունը բացահայտվել է, 22-ամյա երիտասարդը ձերբակալվել է։
SHAMSHYAN.com-ն դեպքի վայրից տեղեկություններ ունի։
