Լիանա Հարությունյանի եւ Լիլիթ Աղեկյանի պաշտպան`Զարուհի Փոստանջյանը հայտարարություն է տարածել․
Այսօր՝ 2025 թվականի հուլիսի 17-ին, երեկոյան ժամերին (ժամը 16:30-ից 17:00-ի սահմաններում), Լիլիթ Աղեկյանի գործով վարույթն իրականացնող քննիչ Անտոնյանը քննչական գործողություններից ընդամենը մեկ ժամ առաջ կապ է հաստատել իմ օգնականի հետ՝ հայտնելով, որ ցանկանում է խոսել ինձ հետ։
Իմ օգնականը երկու անգամ տարբեր ժամերի զրուցել է քննիչի հետ՝ տեղեկացնելով, որ տվյալ պահին որևէ կերպ չի հաջողվում կապ հաստատել ինձ հետ։ Երբ օգնականս փորձել է ճշտել զանգի պատճառը, քննիչ Անտոնյանը հայտնել է, որ պատրաստվում է այսօր ժամը 18:00-ին քննչական գործողություն իրականացնել Լիլիթ Աղեկյանի գործի շրջանակում և ցանկանում է ժամի մասին տեղեկացնել։
Քննիչն անտեսելով իմ զբաղվածությունը և առանց նախապես համաձայնեցնելու, ինքնակամ նշանակել է օրն ու ժամը՝ այդ մասին միայն վերջին պահին տեղեկացնելով։ Նա էլեկտրոնային փոստով ուղարկել է ծանուցում (դարձյալ մոտավորապես մեկ ժամ առաջ), որը տեսել է միայն իմ օգնականը, ով կրկին չի կարողացել ինձ տեղեկացնել այդ մասին։
Քննիչ Անտոնյանի նման վարքագիծը խոսում է այն մասին, որ նա նպատակ ունի Լիլիթ Աղեկյանին զրկել իր պաշտպանությունից և իրադարձությունները կազմակերպել այն կերպ, որ փաստաբանը ֆիզիկապես չկարողանա ներկա գտնվել գործողությանը։ Սա, սակայն, ունի ավելի խորքային ենթատեքստ՝ քննիչն ակնհայտորեն փորձում է ապօրինի գործելակերպով հիմքեր ստեղծել Լիլիթ Աղեկյանի նկատմամբ հերթական ապօրինի գործողությունն իրականացնել` ոմանց կողմից ակնհայտ պատվերի շրջանակներում։
Այս իրադարձությունների համադրությունից ակնհայտ է դառնում, որ քննիչ Անտոնյանը, հավանաբար իր գործընկերների հետ համատեղ, կանխամտածված կերպով կազմակերպում է քննչական գործողություններ առանց իմ մասնակցության՝ դրանով իսկ նպատակ ունենալով ինձ փաստացի հեռացնել Լիլիթ Աղեկյանի գործով նրա պաշտպան լինելուց։
Տեղեկացնում եմ, որ իմ մեկ այլ պաշտպանյալի` Լիանա Հարությունյանի գործով, դատավոր Արշակ Մաթեւոսյանը որոշել է ինձ հեռացնել երեք անչափահաս երեխայի մոր քրեական վարույթից։
Փաստորեն, դատավոր Արշակ Մաթեւոսյանի եւ Շիրակի մարզի քննչական կոմիտեի 10-րդ զինվորական բաժնի քննիչ Անտոնյանի գործողությունները` ուղղված իմ դեմ` Լիանա Հարությունյանի եւ լրագրող Լիլիթ Աղեկյանի քրեական վարույթներից ինձ հեռացնելու փաստերով, համաժամանակյա են եղել` թելադրված նույն կենտրոնից։ Դրանք նպատակ ունեն խափանելու, խանգարելու, ձախողելու իմ՝ որպես փաստաբանի, պաշտպանի մասնագիտական գործունեությունը։ Այսպիսով, բացեիբաց թիրախավորվել են ոչ միայն իմ պաշտպանյալները, այլեւ ես։
