Բելառուսի նախագահ Ալեքսանդր Լուկաշենկոն Ռուսաստանում զինված ապստամբության փորձի ժամանակ հրաման է տվել բանակը լիարժեք մարտական պատրաստության բերել, հաղորդում է «Pul Pervogo» տելեգրամյան ալիքը՝ հղում անելով Մինսկում գեներալների էպոլետների հանձնման արարողության ժամանակ քաղաքական գործչի ելույթին։
«Բոլոր հրամանները տվել եմ՝ բանակը պատրաստության բերելու համար»,- ասել է Լուկաշենկոն։
Քաղաքական գործիչը նշել է, որ իր համար «ցավալի էր դիտել» Ռուսաստանի հարավում տեղի ունեցած իրադարձությունները։
«Մեր քաղաքացիներից շատերը դա սրտին մոտ ընդունեցին: Որովհետև հայրենիքը մեկն է: Եվ մեր հայրենիքը Բրեստից մինչև Վլադիվոստոկ հողն է, ազատությունն ու այստեղ ապրող մեր ժողովուրդները: Պատմությունը վկայում է՝ բելառուսները գիտեն, թե ինչպես պաշտպանել իրենց հողը: Մենք եղել ենք և կլինենք ավելի ուժեղ, քան ցանկացած մարտահրավեր»,- ասել է Լուկաշենկոն։
