Այսօր` մարտի 31-ին, լրագրողների հետ հանդիպման ժամանակ կանադահայ կինոռեժիսոր, «Արդարություն Հայաստանում» նախաձեռնող խմբի անդամ Ատոմ Էգոյանը խոսեց «Սփյուռքի հայտնի հայերը ընտրություններին՝ որպես դիտորդ» թեմայով:
«Ես այս երկիրը շատ եմ սիրում, երկրի ոսկորները բավական խորն են և ուժեղ»,- ասաց նա և հավելեց,- «Մենք հին ու հպարտ ազգ ենք, բայց բավական ուժեղ, ժողովրդավարությունը մկանի պես է, և այն պետք է մարսվի, որ ուժեղանա»:
Նրա պնդմամբ` Հայաստանը բավական ունիկալ քաղաքական պատմություն ունի, սակայն միակուսակցական այս համակարգը չի կարող ոչ մի լավ բանի հանգեցնել:
Կինոռեժիսորն ընդգծեց, որ ընտրությունների օրը շրջելու են տարբեր տեղամասերում ու մասնակցելու են ձայների հաշվարկին:
«Երկրում անարդար իրավիճակի պատճառով մարդիկ հեռանում են: Ինքնաբռնակալություն է այն, որ մարդիկ մտածում են չգնալ ընտրությունների: Դա նշանակում է, որ մենք չունենք մեր իսկ ձայնը»,- նշեց նա:
Ատոմ Էգոյանը համոզված է, որ ընտրությունները խախտումներով են լինելու, քանի որ արդեն բավական դեպքեր են եղել, ահազանգերն էլ կան:
«Մենք չպիտի զոհը դառնանք բռնակալության, ինքնաբռնակալության և անտարբերության»,-ասաց նա:
Առավել մանրամասն` տեսանյութում:
