Տեր Մանուկը հավատավոր ժողովրդին կոչ է անում համբերել, չընկճվել։
«Իրապես, համբերություն է պետք ու կատարյալ զսպվածություն։ Ես իմ հոգևոր եղբայրներին էլ միշտ ասում եմ՝ զսպված եղեք, գնահատեք ձեր խոսքը, շատ ուշադիր եղեք ձեր խոսքի մեջ։ Կգա մի ժամանակ, որ ամեն բան կանցնի, կգնա, որովհետև մթությանը միշտ լույսն է հետևում։ Անցնելու են այս հալածանքները, վաղը-մյուս օրը մեր բանտարկված Սրբազան Հայրերը ազատվելու են, իսկ նրանք, ովքեր մատնիչի հոգով եղան, իրենց հոգևոր եղբայրներին մատնեցին ու դեռ շարունակում են մատնել, գալու է մի օր, որ երես առ երես չեն կարողանալու նայել իրենց հոգևոր եղբայրների աչքերի մեջ»,- ասաց Տեր Մանուկը։
Արագածոտնի թեմում շատ է զգացվում Մկրտիչ Սրբազանի պակասը։ Չնայած հոգևորականների միասնությանն ու ջանքերին, միևնույն է, անհնար է նրա գործը շարունակել։
«Դուք գիտե՞ք՝ մենք որքան ենք զգում մեր Մկրտիչ Սրբազանի պակասն Արագածոտնի թեմից ներս, այն ահռելի ծառայությունը, որ Մկրտիչ Սրբազանը մատուցում էր, ցավալիորեն, այսօր մի տեսակ կանգ է առել։ Այո՛, մենք հնարավորինս փորձում ենք պտտել այդ անիվը, բայց Սրբազանի աշխատանքն այնքան կարևոր ու ծանր էր, որ հիմա մենք 7-8 քահանաներով չենք կարողանում առաջ տանել։ Կարոտով, համբերությամբ սպասում ենք մեր Սրբազան Հայրերի շուտափույթ ազատությանը, որ վաղը-մյուս օրը գան, հասնեն մեզ, բայց, հատկապես, աղոթում ենք մեր Միքայել Սրբազանի համար, որովհետև այս պահին առողջական խնդիր ունի, թող Տերն իր անսպառ ու առատ ողորմությամբ Սրբազան Հորը առողջություն պարգևի, որ շուտ ոտքի կանգնի, մնացյալ ամեն ինչ քիչ-քիչ կանցնի»,- հավելեց Տեր Մանուկ քահանա Զեյնալյանը։
