ԱՄՆ նախկին նախագահ Դոնալդ Թրամփը Մանհեթենի դատարանում իրեն մեղավոր չի ճանաչել 34 կետով, CNN-ին ասել է իր աղբյուրը, որը լսել է նրա նկատմամբ առաջադրված մեղադրանքները՝ կապված «լռություն գումարի դիմաց» հետաքննության հետ: Թրամփին մեղադրանք է առաջադրվել այն բանից հետո, երբ երդվյալ ատենակալները հետաքննություն են անցկացրել «թաքնված գումարների» հետ կապված, որոնք վճարվել են 2016 թվականի նախագահական արշավի ժամանակ արտաամուսնական սեռական հարաբերությունների մասին մեղադրանքները քողարկելու համար: Հաղորդվում է, որ հետաքննությունը բացահայտել է վեցանիշ գումար, այդ թվում՝ 280,000 դոլար, որը վճարվել է պոռնոդերասանուհի Սթորմի Դենիելսին և Playboy-ի նախկին մոդել Քարեն Մաքդուգալին: Երկուսն էլ պնդում են, որ սեռական հարաբերություններ են ունեցել ամուսնացած Թրամփի հետ քաղաքականություն մտնելուց տարիներ առաջ: Ինքը՝ Թրամփը, հերքում է երկու կանանց հետ սեռական հարաբերություններ ունենալը։
Թրամփը ԱՄՆ առաջին նախկին նախագահն է, որին քրեական մեղադրանք է առաջադրվել։
Աղբյուրի փոխանցմամբ, Մեծ ժյուրին հրապարակել է մեղադրական եզրակացությունը:
Թրամփի փաստաբանական թիմը հայտնել է, որ ԱՄՆ նախկին նախագահը մտադիր է վիճարկել մեղադրանքները:
Մանհեթենի շրջանային դատախազություն գնալու ճանապարհին, որտեղ նրան ավելի ուշ ձերբակալել են, Թրամփը գրառում է արել Truth Social-ում՝ իր հետ կատարվողն անվանելով «անակնկալ»։
«Ուղեւորվում եմ Ներքին Մանհեթեն, դատարանի շենք: Այս ամենը թվում է՝ շատ սյուռ է, նրանք պատրաստվում են ինձ ձերբակալել: Ես չեմ կարող հավատալ, որ դա տեղի է ունենում Ամերիկայում: MAGA! (Դարձրե՛ք Ամերիկան կրկին մեծ – ԱՄՆ Հանրապետական կուսակցության կարգախոսը – խմբ.)»,- գրել է ԱՄՆ նախկին նախագահը։
Դեռ Թրամփի դատարան ժամանելուց առաջ նրա կողմնակիցները հավաքվել էին շենքի մոտ և իսկական քաոս առաջացրել՝ աղմուկ բարձրացնելով ու սուլելով՝ թույլ չտալով խոսել Թրամփի գլխավոր դաշնակիցներից մեկին՝ կոնգրեսական Մարջորի Թեյլոր-Գրինին։
Սպիտակ տան արձագանքը հետաքրքիր էր. Սպիտակ տան մամուլի քարտուղար Կարին Ժան-Պիերն ասել է, որ ԱՄՆ նախագահ Ջո Բայդենը տեղյակ է իր նախորդի մեղադրանքին և ակնհայտորեն կընդունի լուրերը, բայց դա նրա ուշադրության կենտրոնում չէ։
«Լսեք, նախագահը պատրաստվում է կենտրոնանալ ամերիկացի ժողովրդի վրա, ինչպես անում է ամեն օր: Սա այն թեման չէ, որը նրա ուշադրության կենտրոնում է։ Նա պատրաստվում է կենտրոնանալ այնպիսի բաների վրա, ինչպիսիք են ամերիկացիների համար գների հետագա կրճատումն ապահովելը»,- ասել է Ժան-Պիերը՝ ի պատասխան CNN-ի հարցին:
Հարցը, թե ինչպես կանդրադառնա այս դատավարությունը 2024 թվականի առաջիկա նախագահական ընտրություններին Թրամփի մասնակցության վրա, մնում է բաց։
Ինչպես նշում է The Associated Press-ը, այս գործը ԱՄՆ-ին գցում է չբացահայտված իրավական ջրերի մեջ, քանի որ Թրամփը դարձավ երկրի առաջին նախկին նախագահը, ում մեղադրանք է առաջադրվել։ Իսկ քաղաքական հետևանքները կարող են հսկայական լինել հաջորդ տարվա նախագահական ընտրություններից առաջ: Թրամփը պատրաստվում է երրորդ անգամ առաջադրվել նախագահի պաշտոնում և արդեն հայտարարել է, որ իր դեմ հարուցված գործը կարող է վնասել այդ ջանքերին, թեև նրա նախընտրական արշավն արդեն ակտիվորեն գումար է հավաքում՝ վկայակոչելով վերջին իրադարձությունները:
Թրամփի նախընտրական շտաբը հայտարարել է, որ մեղադրական եզրակացության մասին լուրերի հրապարակումից հետո առաջին 24 ժամվա ընթացքում հավաքել է ավելի քան 4 միլիոն դոլար:
