Ավարտվել է Ուկրաինայի նախագահ Վլադիմիր Զելենսկու հանդիպումը Ֆրանսիայի նախագահ Էմանուել Մակրոնի, Գերմանիայի կանցլեր Օլաֆ Շոլցի, Իտալիայի վարչապետ Մարիո Դրագիի և Ռումինիայի նախագահ Կլաուս Իոգանիսի հետ։ Այս մասին հինգշաբթի՝ հունիսի 16-ին, հայտնել է նախագահի աշխատակազմի ղեկավար Անդրեյ Երմակը։
«Ուկրաինան ունի միջազգային կոալիցիայի հաստատուն աջակցությունը: Մենք պետությունների ղեկավարներին ենք հանձնել Ռուսաստանի դեմ պատժամիջոցների առաջարկների ամբողջական փաթեթը, որը պատրաստել է Մակֆոլ-Երմակ միջազգային խումբը: Մենք պետք է մեծացնենք ճնշումը ագրեսորի վրա, աշխատենք գազային էմբարգոյով պատժամիջոցների յոթերորդ փաթեթի վրա։ Եվրոպան այսօր Ուկրաինայի հետ է։ Մենք հաղթելու ենք»,- գրել է նա սոցցանցում։
Միևնույն ժամանակ Շոլցը շնորհակալություն է հայտնել Զելենսկիին G7-ի գագաթնաժողովին մասնակցելու հրավերն ընդունելու համար։
«Մենք՝ եվրոպացիներս, ամուր կանգնած ենք ձեր կողքին»,- գրել է նա թվիթերում։
Հանդիպումը տևել է մոտ երկու ժամ։
