Ժնեւում ընթացող ՖԻԴԵ-ի «Գրան պրիի» երրորդ փուլում այսօր կայացան 6-րդ տուրի պարտիաները:
Լեւոն Արոնյանը սպիտակներով հանդիպեց Պենտալա Հարիկրիշնայի հետ: Մեր ուժեղագույն շախմատիստն արդեն խաղասկզբում անզգույշ գործեց եւ հայտնվեց բարդ իրավիճակում: Ճիշտ է, նրանց հաջողվեց հավասարեցնել դիրքը, սակայն դրա համար շատ ժամանակ կորցրեց եւ հայտնվեց ցայտնոտում: Հնդիկ գրոսմայստերն օգտվեց այդ առավելությունից եւ ի վերջո 38-րդ քայլին հասավ հաղթանակի:
Լեւոն Արոնյանն առաջին պարտությունը կրեց մրցաշարում եւ մնաց նույն 3 միավորով: Նա նահանջեց մրցաշարային աղյուսակի միջին հորիզոնականներ եւ այժմ զիջում է վեց շախմատիստների:
Մրցանակային տեղ զբաղեցնելու համար Լեւոն Արոնյանին հարկավոր է դիմել ռիսկի եւ հաղթել մնացած երեք տուրերում:
