Մահվանս օրը անձրև կմաղի... հրապարակել են Ալվարդ Պետրոսյանի վերջին` հրաժեշտի

Ալվարդ Պետրոսյանի հարսը` Երևանի Փ. Թերլեմեզյանի անվան գեղարվեստի պետական քոլեջի տնօրեն Աննա Մնացականյանը, ֆեյսբուքյան իր էջում հրապարակել է Ալվարդ Պետրոսյանի հրաժեշտի վերջին բանաստեղծությունը։

Մեկ ծնելուց է աշխարհը փոխվում,

Մեկ կորցնելուց։

Միջուկը կյանքն է՝ խելահեղ, հզոր,

Մթին անդունդներ և լույսեր պես-պես։

Մահվանս օրը անձրև կմաղի

Երկինք առաքված իմ արցունքներն են։

Աշուն կլինի, օ, Վահան Տերյան,

Անձրևն էլ սառը, քաղցր, անվախճան։

Գարունով հղի այս ջուրը երկնից

Ծաղկունք է ու կյանք, հրավառություն,

Այս բուրյան շքեղ նվերը վերջին

Ձեզ համար է, Ձեզ, օրհնանք ամենքին։

Ինչպես ավելի վաղ տեղեկացրել էինք, այսօր, կյանքի 76-րդ տարում երկարատև ծանր հիվանդությունից հետո մահացել է գրող, հրապարակախոս, ՀՀ մշակույթի վաստակավոր գործիչ, ՀՀ Պատվո շքանշանակիր Ալվարդ Պետրոսյանը։