Գերմանիայի արտաքին գործերի նախարար Անալենա Բեբոկը հասկանում և աջակցում է Եվրամիությանն անդամակցելու Ուկրաինայի ցանկությունը, սակայն գտնում է, որ ընդունման գործընթացը չի կարող տեղի ունենալ մեկ գիշերում։ Այդ մասին նա հայտարարել է երկուշաբթի օրը կայացած ճեպազրույցում, հաղորդում է Ukrinform-ը։
«Ինչ վերաբերում է ԵՄ-ին անդամակցելուն, ապա դա չի նշանակում, որ մենք արթնացել ենք նոր աշխարհում։ Անդամակցություն ստանալն այնպիսի բան չէ, որ կարելի է որոշել մի քանի ամսվա ընթացքում, դա ինտենսիվ ու խորը փոխակերպման գործընթաց է»,- ընդգծել է քաղաքական գործիչը։
Միաժամանակ նա նշել է, որ «ԵՄ-ն միշտ եղել է տուն, որի դռները բաց են եղել, իսկ Ուկրաինան եվրոպական տան մի մասն է։»
«Մենք գիտենք, որ ուկրաինացիների ցանկությունը եղել է և կա ԵՄ-ի հետ սերտ կապեր ունենալը»,- հավելել է նա։
Հիշեցնենք, որ 2022 թվականի փետրվարի 28-ին նախագահ Վլադիմիր Զելենսկին ստորագրել է Եվրամիությանը Ուկրաինայի անդամակցության դիմումը։
