Իշխանությունները հերթական անգամ համաձայնվեցին ադրբեջանական օրակարգին, իսկ հայկական կողմն այդպես էլ ոչինչ չստացավ, ավելին՝ մեզ ավելի ծանր պայմաններ թելադրվեցին, որն էլ ընդունվեց Նիկոլ Փաշինյանի կողմից: «Փաստինֆո»-ի հետ զրույցում նման դիտարկում արեց ԱԺ նախկին պատգամավոր Սոֆյա Հովսեփյանը՝ անդրադառնալով երեկ Սոչիում Հայաստանի, Ռուսաստանի և Ադրբեջանի ղեկավարների եռակողմ հանդիպմանն ու դրա արդյունքների մասին տարածված հայտարարությանը:
Սոֆյա Հովսեփյանի դիտարկմամբ՝ հայտարարության հիմնական դրույթը սահմանագծման և սահմանազատման աշխատանքները սկսելու հարցն է, որի արդյունքում, ըստ նրա, հնարավոր է խնդիրներ ունենանք ոչ միայն Սյունիքում, այլ նաև մյուս մարզերում.
«Եթե նոյեմբերի 9-ի հայտարարության միջից դուրս էր բերված անկլավների հարցը, այս պարագայում հստակ է, որ սահմանագծման և սահմանազատման արդյունքում կունենանք բավականին լուրջ իրավիճակ ոչ միայն Սյունիքում, այլ նաև՝ Տավուշում, Արարատում, Սյունիքում , Վայոց ձորում»,-ասաց նա:
Հարցին՝ թե առանց Արցախի կարգավիճակի հստակեցման սահմանազատման և սահմանագծման գնալն ի՞նչ հետևանքներ կարող ՝ ունենալ պատգամավորն ասաց.
«Դա ամենակարևոր հարցն է՝ դելիմիտացիայի և դեմարկացիայի դեպքում ի՞նչ է լինելու Արցախի կարգավիճակի հարցը, ռուսական զորքերի դուրս բերումից հետո ի՞նչ է լինելու Արցախի հետ՝ եթե կարգավիճակ չունի: Այսինքն՝ մենք հիմա քնեցնում ենք ժողովրդին, որ 5 տարի հետո ուղղակիորն Արցախն անցնի Ադրբեջանի վերահսկողության տակ»,-ասաց Հովսեփյանը:
Զրուցակիցը նկատեց՝ փաստաթղթում գրված է ճանապարհներ արտահայտությունը, իսկ բանավոր խոսքում ՌԴ նախագահի կողմից հնչել է միջանցք արտահայտությունը, ըստ Հովսեփյանի՝ Զանգեզուրի միջանցքի շուրջ կուլիսային պայմանավորվածություն կա.
«Սա խոսում է այն մասին, որ կուլիսային պայմանավորվածությամբ Զանգեզուր բառը հանվել է, որպեսզի մարդկանց ուշադրությունը շեղեն հարցից, քանի որ մարդկանց դժգոհությունները Զանգեզուրի միջանցքի վերաբերյալ են: Զանգեզուր բառը, երբ դուրս է բերվում, մարդիկ այլևս ուշադրություն չեն դարձնի դրան, բայց ՌԴ նախագահը ամփոփիչ ելույթում խոսեց միջանցքների ապաշրջափակման, այլ ոչ թե ճանապարհների մասին: Մենք շատ լավ գիտենք, որ ճանապարհը և միջանցքը նույնը չի, եթե խոսքը ճանապարհի մասին է, ինչո՞ւ է արտաբերվում միջանցք բառը:
Եթե միջանցք եղավ, ապա մեր տիրապետության տակ այն չի լինելու, խոսվեց նաև ռուսական կողմի վերահսկողության մասին, սակայն դա էլ անհասկանալի է»,-ասաց ԱԺ նախկին պատգամավորը:
Սոֆյա Հովսեփյանն արձանագրեց, որ դեռևս նոյեմբերի 9-ի կարևորագույն կետերը չեն կատարվել՝ մասնավորապես Ադրբեջանը մինչ օրս հրաժարվում է վերադարձնել գերիներին, սակայն իշխանությունները շտապում են նոր փաստաթուղթ ստորագրել.
«Այս նոր հայտարարության մեջ խոսում են հումանիտար հարցերի մասին, հումանիտար հարցերը հավանաբար գերիներին է վերաբերվում, բայց որևէ բան չի հստակեցվում, կարելի է ենթադրել, որ գերիների հարցն այդպես էլ չի լուծվում»:
Զրուցակիցը նաև հիշեցրեց, որ ԱԳ նախարար Արարատ Միրզոյանը մի քանի անգամ շեշտել է, որ սահմանագծման և սահմանազատման հարցի մասին քննարկում կլինի այն ժամանակ, երբ գերիների հարցի լուծվի և ադրբեջանցի զինվորները դուրս բերվեն Հայաստանի տարածքից.
«Կարող ենք փաստել, որ ԱԳ նախարարի պահանջը և վարչապետի բանակցությունները չեն համընկնում: Ոչ միայն գերիների պահը ճշտվեց, այլ նաև նոյեմբերի 16-ի մեկօրյա լարվածությունից հետո խոսվեց այն մասին, թե գերիների հարցը պետք է քննվի, այսինքն՝ իրենց համար սա դառնում է երկրորդական հարց, մինչև քննեն, տեսնեն՝ ի՞նչ պատճառով են գերի ընկել, և միգուցե իրենք առհասարակ չզբաղվեն այդ հարցով, այնինչ բոլորս էլ գիտենք, որ գերի ընկնելու հիմնական պատճառներից մեկը եղել է անփույթ կազմակերպվածությունը և հրամանի բացակայությունը»,-ասաց նա:
Նկատենք, որ եռակողմ հայտարարության մեջ որևէ կերպ արձանագրված չէ ադրբեջանական զինված ուժերի ապօրինի ներխուժման մասին ՀՀ ինքնիշխան տարածք, ոչ էլ Նիկոլ Փաշինյանը խոսեց դրա մասին:
Ըստ Հովսեփյանի՝ չբարձրաձայնեց, քանի որ «ունի կրավորական կեցվածք դրա նկատմամբ և անկարողություն».
