Պատերազմից հետո Վարդենիս-Մարտունի ավտոճանապարհի զգալի հատվածը հայերի համար փակվեց։ Արցախի և Գեղարքունիքի մարզի բնակիչներն ահազանգում են Վարդենիս-Քարվաճառ ավտոճանապարհը վերագործարկելու օրհասական նշանակության մասին։
ԱԺ պատգամավոր Թագուհի Թովմասյանը «Փաստինֆո»-ի հետ զրույցում ասաց, որ արդեն երկու ամիս է բարձրաստիճան պաշտոնատար անձանց հետ հանդիպումների ժամանակ բարձրաձայնում է այս հարցը։ Պատգամավորը նկատեց՝ նոյեմբերի 9-ի եռակողմ հայտարարության 9-րդ կետում հստակ նշվում է, որ տարածաշրջանում բոլոր տնտեսական և տրանսպորտային կապերն ապաշրջափակվում են, հետևաբար ինչու՞ պետք է համայն հայության ջանքերով վերանորոգված Վարդենիս-Մարտակերտ ավտոճանապարհը չաշխատի հայերի համար․ «Ադրբեջանցիները ռուս խաղաղապահների ուղեկցությամբ կարողանում են Դրմբոնից գալ մինչև Քարվաճառ։ Այս դեպքում Գեղարքունիքի մարզի և Արցախի բնակիչների մոտ տրամաբանական հարց է առաջանում, թե ինչու են այդ ճանապարհից օգտվում միայն ադրբեջանցիները։ Ռուս խաղաղապահների ուղեկցությամբ թող ճանապարհից օգտվեն նաև հայերը»,-ասաց պատգամավորը։
Պատգամավորի փոխանցմամբ՝ Արցախում աշխատող Վարդենիսի, Մարտունու, Ճամբարակի բազմաթիվ բնակիչներից ահազանգեր է ստացել, որ ամենօրյա կամ երկու օրը մեկ պարբերականությամբ ստիպված են լինում Արցախ գնալ․ «Ստացվում է՝ 70-80 կմ ավտոճանապարհը նրանք հիմա ստիպված են փոխարինել 400-500 կմ-ով, ինչն աբսուրդ է։ ՀՀ իշխանությունները պետք է օր առաջ այդ հարցը դարձնեն բանակցային քննարկման թեմա և վերագործարկումը դարձնեն խիստ անհրաժեշտ։ Պատերազմից հետո Լաչինի միջանցքով երթևեկող մեր համաքաղաքացիներից եղան մարդիկ, որոնք գերեվարվեցին։ Այսինքն` անվտանգության մասով լուրջ խնդիր ունենք»,-ասաց Թագուհի Թովմասյանը։
Վերջինս հստակ տվյալ չի կարող ասել, թե մարզի քանի բնակիչ է աշխատում Արցախում, սակայն Վարդենիսից միայն 100 մարդ ներգրավված է Արցախում հանքարդյունաբերության, շինարարության ոլորտի աշխատանքներում․ «Հիմա նրանք կա՛մ պետք է իրենց աշխատանքը փոխեն, կա՛մ ամեն օր 400-500 կմ կտրեն և Գորիսով, Լաչինի նեղլիկ, անհարմար միջանցքով հասնեն Արցախ։ Մեր երկրի քաղաքացիների իրավունքների վերականգմանն ուղղված հստակ քայլ է, որը պետք է իշխանություններն անեն։ Այս հարցով արդեն դիմել եմ ՀՀ ԱԳ նախարարին՝ պահանջելով այն դարձնել բանակցային թիվ մեկ թեմա։ Այս հարցի լուծման համար պատրաստ եմ ընդհուպ ամենածայրահեղ ակցիաներն իրականացնել, որպեսզի մեր ժողովրդի ձայնը լսելի լինի, և մենք կարողանանք ամեն գնով հասնել Վարդենիս-Մարտակերտ ավտոճանապարհի վերագործարկմանը»,-նշեց պատգամավորը, ով այս պահին ընտրել է հարցի բարձրաձայնման դիվանագիտական, քաղաքական, պաշտոնական խողովակները․ «Բնակիչները վրդովված են։ Մտադրություն ունեին մի քանի ավտոճանապարհներ փակել, ակցիաներ իրականացնել՝ պահանջելով խնդրի օր առաջ լուծում։
Նրանց խնդրել եմ ժամանակ տալ, դեռևս ակցիաներ չանել և սպասել։ Կփորձեմ հարցը պաշտոնական խողովակներով բարձրաձայնել, բայց եթե սայլը տեղից չշարժվի, քաղաքացիներն ազատ են իրենց ձայնը բարձրացնելու տարբերակի ընտրության հարցում»,-ամփոփեց Թագուհի Թովմասյանը։
