«Ալիևը նախ թող իր տարածքը շենացնի, իր բանկիչներին, որոնց տեսնում ենք թշվառության մեջ, բացի Բաքվի կենտրոնական շրջաններից, հետո նոր մտածի մնացածի մասին, որը երազանք է իր համար», -ճեպազրույցի ժամանակ ասել է ՀՀ ՊՆ ներկայացուցիչ Արծրուն Հովհաննիսյանը՝ անդրադառնալով Ադրբեջանի նախագահի այն հայտարարությանը, թե ինքը կշենացնի Ղարաբաղը և հայերն ու ադրբեջանցիները կարող են ապրել միասին:
Հիշեցնենք, որ նույն հարցին դարձյալ Հայկական միասնական տեղեկատվական կենտրոնում անդրադարձել է ԱԳՆ մամուլի խոսնակ Աննա Նաղդալյանը: Նաղդալյանն ասել է, որ Ադրբեջանի նպատակն է բնաջնջել Արցախի բնիկ ժողովրդին, և Ադրբեջանն Արցախը ցանկանում է առանց իր բնիկ ժողովրդի: Մարդասիրական այն կոպտագույն խախտումների մասին, որոնք իրականացնում է Ադրբեջանը՝ մինչև անգամ բուժհիմնարկներ թիրախավորելով, ու այն էլ՝ համավարակի օրերին: Ժնևյան կոնվենցիայի ակնհայտ խախտումներ են արձանագրվել նաև Հադրութի շրջանում, իսկ պատերազմական հանցագործությունները ոգևորիչ են ադրբեջանիցիների համար: Այն տարածքները, որոնք ժամանակավոր անցնում են Ադրբեջանի վերահսկողության տակ, ավերվում են լիարժեքորեն, որպեսզի բնիկ ժողովուրդն այլևս չկարողանա վերադառնալ իր բնակավայրեր:
«Պատերազմական կանոնների պահպանումը, մարտական գործողություններում իրականացվող քայլերով և խաղաղ բնակչության հանդեպ դրսևորված հարգանքով է, որ կանոնավոր բանակը տարբերվում է ահաբեկչական խմբավորումից, իսկ պետությունը տարբերվում է ահաբեկչական կազմակերպությունից: Ակնհայտ և միտումնավոր կերպով խախտելով պատերազմական կանոնները և միջազգային մարդասիրական իրավունքը, Ադրբեջանում խրախուսելով ու հպարտության առարկա դարձնելով ռազմական հանցագործությունը՝ Ադրբեջանի իշխանությունն իր վրա է վերցնում այս բոլոր գործողությունների կարճաժամկետ և երկարաժամկետ հետևանքները»,- հավելել է մամուլի խոսնակը: