Չի կարելի օգտագործել ստեղծված իրավիճակը և անհասկանալի հայտարարություններ անել: Պետք է հստակ հասկանալ, որ առանց բանակի ներուժի ամրապնդման երկիրը չունի ապագա և պետք է բալանսը գտնել: Բանակը կարևորագույն ինստիտուտ է և բանակին պետք է մոտենալ շատ մեծ զգուշությամբ: Այս մասին «Փաստինֆո»-ի հետ զրույցում ասաց «Բարգավաճ Հայաստան» խմբակցության քարտուղար Արման Աբովյանը՝ անդրադառնալով Նիկոլ Փաշինյանի հայտարարությանը, որ պետք է կրճատել ժամկետային զինծառայության ժամկետը.
«Ժամկետային զինծառայության համակարգը ընդհանրապես փոխենք, ժամկետը կրճատենք. կա գաղափար, որ պետք է լինի 5 տարին մեկ 3-ամսյա ծառայություն, որպեսզի երիտասարդները մարտական նվազագույն հմտություններին տիրապետեն»,- Վայոց Ձորում հայտարարել էր Փաշինյանը:
ԲՀԿ քարտուղարի գնահատմամբ՝ Նիկոլ Փաշինյանի այս հայտարարությունը նախընտրական է.
«Այս հայտարարությունը լոկ նախընտրական հայտարարություն է՝ առանց որևէ հասկանալի հիմնավորումների և թեզերի: Այն, ինչ Փաշինյանը հայտարարել է, այնքան թերի է և անհասկանալի, որ նույնիսկ քննարկելու թեմա չկա: Իշխանությունների բոլոր գործողությունները և հայտարարությունները,որոնք արվում են, հատկապես բանակի վերաբերյալ, պետք է հիմնավորված լինեն: Եթե հայտարարում են, որ ժամկետ են կրճատում, բա դրա փոխարեն բանակի մարտունակությունն ինչպե՞ս են պահպանելու»,-ասաց Աբովյանը և ավելացրեց. «Սխալ եմ համարում օգտագործել սկզբունքային խնդիրները, որոնք ծառացած են բանակի առաջ և դա դարձնել հերթական պոպուլիստական թեզը»: