Ռուսաստանն Ադրբեջանին փոխանցել է Ղարաբաղում կռվող սիրիացի գրոհայինների մասին տվյալները. Դումայի պատգամավոր

ՌԴ Պետդումայի ԱՊՀ հարցերով հանձնաժողովի առաջին փոխնախագահ Վիկտոր Վոդոլացկին РИА Новости-ի հետ զրույցում հայտնել է, որ Ռուսաստանն Ադրբեջանի պաշտպանության նախարարությանը տեղեկություններ է տրամադրել Լեռնային Ղարաբաղում ընթացքող մարտերում սիրիացի գրոհայինների մասնակցության մասին:

Ինչպես փոխանցում է «Սպուտնիկ» գործակալությունը, Վոլոդացկին հավելել է, որ եթե ՌԴ Արտաքին հետախուզության ծառայության պետ Սերգեյ Նարիշկինը հայտարարել է, որ արգելված ահաբեկչական կազմակերպությունների սիրիացի գրոհայինները Թուրքիայի միջոցով եկել են Ղարաբաղ, ապա նա դրա համար անհերքելի ապացույցներ ունի: «Իսկ թե ինչու Ադրբեջանի պաշտպանության նախարարությունը կամ պատասխանատու անձինք չեն տեղեկացրել իրենց նախագահին, դա ուրիշ հարց է: Պատասխանատու անձինք, հավանաբար, գործում են ոչ իրենց նախագահի օգտին և ինչ-որ անհասկանալի խաղ են խաղում նրա դեմ»,- շեշտել է պատգամավորը:

Ավելի վաղ Ադրբեջանի նախագահ Իլհամ Ալիևը հայտարարել էր, որ ո՛չ Մոսկվան, ո՛չ Փարիզը Բաքվին ապացույց չեն տրամադրել ղարաբաղյան մարտերին սիրիացի գրոհայինների մասնակցության մասին:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 25-ի դրությամբ Արցախի զինուժը խոցել է հակառակորդի՝ 16 ուղղաթիռ, 24 ինքնաթիռ, 217 անօդաչու թռչող սարք, 600 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 6 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 6614 զոհ։ Հայկական կողմից, նախնական տվյալներով, կա 974 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում զոհվել է 2 քաղաքացիական անձ, Արցախում զոհվել է 40 քաղաքացիական անձ, վիրավորվել է 120 քաղաքացիական անձ, նախնական տվյալներով՝ լրջորեն վնասվել է ավելի քան 6700 մասնավոր սեփականության անշարժ գույք, ավելի քան 640 մեքենա, շուրջ 1110 ենթակառուցվածքային, հանրային և արտադրական նշանակության օբյեկտներ:

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն։

Արդեն երկու անգամ հայտարարվել է մարդասիրական հրադադարի մասին, սակայն ադրբեջանական զինուժը դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում։