Ազգային ժողովի նախկին պատգամավոր, ԵԿՄ վարչության նախկին նախագահ, գեներալ Մանվել Գրիգորյանի փաստաբան Արսեն Մկրտչյանի՝ երեկվա ֆեյսբուքյան գրառումը տարընկալումների առիթ է դարձել: Գրառման մեջ մասնավորապես ասվել է. «Այս պահից սկսած դադարեցնում եմ Մանվել Գրիգորյանի պաշտպանությունը նրա՝ զինվորի կամ ազատամարտիկի հացը յուրացնելու մեղադրանքի մասով, նման մեղադրանքն անհիմն հերյուրանք լինելու պատճառով:
ArmDay.am-ի հետ զրույցում փաստաբանը նշեց, որ գրառումը հատուկ մարդկանց համար է արված, այլ ոչ թե հասարակության լայն շերտերի և հատուկ ենթատեքստ ունի:
«Մանվել Գրիգորյանի պաշտպանությունից ես չեմ հրաժարվում, նրա մեղադրանքը համարում եմ անհիմն: Ինչպես ՀՔԾ-ն է հայտարարություն տարածում, նույն կերպ էլ ես եմ հայտարարություն տարածում, որ ՀՔԾ-ի հայտարարությունը իրականությանը չի համապատասխանում զինվորի սնունդ յուրացնելու մասով»,-ասաց նա:
Փաստաբանը նշեց, որ նախաքննությունն ավարտվել է, և եթե որպես փաստաբան ցանկություն կլինի ներկայացնել Մանվել Գրիգորյանի շահերը,հաջորդիվ պայմանագրով այդ հարցը կկարգավորվի, կամ չի կարգավորվի:
«Նախաքննության փուլում մասնակցել եմ պայմանագրով, եթե դատաքննության փուլում ևս մասնակցեմ, էլի պայմանագրի դեպքում կմասնակցեմ»,-ասաց փաստաբանը:
