Առողջապահության նախարար Արսեն Թորոսյանի նշանակումների շուրջ շարունակվում են դժգոհությունները: Այս անգամ ուշադրության կենտրոնում է գտնվել Հոգեկան առողջության պահպանման ազգային կենտրոնի տնօրեն Նարեկ Վանեսյանը, ով երեկ սկանդալ է սարքել Բժշկական համալսարանում:
Ինչպես հայտնել էինք, հոկտեմբերի 24–ին, միջադեպ էր եղել Երևանի պետական բժշկական համալսարանում: Նարեկ Վանեսյանը բժշկական համալսարանի պրոֆեսորադասախոսական անձնակազմի ու «Բուժհաստատությունների կառավարում» կրթական ծրագրի շրջանավարտների հետ հանդիպման ընթացքում անհավասարակշիռ պահվածք է ցուցաբերել՝ հարուցելով ներկաների զայրույթը, որից հետո մի խումբ բժիշկներ Նիկոլ Փաշինյանին, Արսեն Թորոսյանին, Արայիկ Հարությունյանին բաց նամակ էին հղել:
ArmDay.am-ը միջադեպի հետ կապված կապ հաստատեց Առողջապահության նախարարության հետ, որտեղից հայտնեցին, որ նախարարի հայտարարությունից բացի այլ բան չեն կարող ավելացնել:
«Մամուլից ծանոթացա ինձ ուղղված բաց նամակին։ Այս պահին գործուղման մեջ եմ Ղազախստանի մայրաքաղաք Աստանայում։ Վերադառնալուն պես կպարզեմ բարձրացված հարցի հանգամանքները»,- գրել է նախարարի պաշտոնակատար Արսեն Թորոսյանը:
ArmDay.am-ը կապ հաստատեց նաև Նարեկ Վանեսյանի հետ, ով խոստացավ, ավելի ուշ պարզաբանում տալ տեղի ունեցածի հետ կապված:
