Իհարկե, իշխանամետ «ֆեյքերի» մասով ևս լինում են գործողություններ, բա այդ պարգևատրումներն ինչի՞ համար են: Այս մասին լրագրողների հետ զրույցում ասաց քաղաքագետ Հրանտ-Մելիք Շահնազարյանը Վերաքննիչ դատարանի դիմաց, որտեղ հրապարակվել է Արա Սաղաթելյանին ազատ արձակվելու մասին որոշումը:
«Ես կարծում եմ, որ իշխանամետ ֆեյքերի մասով գործողություններ ևս լինում են, քանի որ մենք հաճախ տեսնում ենք՝ լավ պարգևատրումներ են ստանում տարբեր նախարարությունների աշխատակիցները, և ավելի քան համոզված եմ, որ նպատակներից մեկն այն է, որ իրենց լավ ծառայեն, քանի որ այս իշխանության հիմնական գործիքը սուտն ու կեղծիքն է»,- ասաց Հրանտ-Մելիք Շահնազարյանը:
Քաղաքագետը նաև ընդգծեց՝ ինչու են կենտրոնացել հենց այս ֆեյքի վրա, քանի որ շատ հաճախ նրա հրապարակումները հետագայում դառնում են իրականություն և ըստ էության, այդ օգտատերը շատ տեղեկություններ ունի:
«Ենթադրում եմ՝ պատճառն այն է, որ շատ են վիրավորվում հրապարակումներից, և որքան հասկացա, այդ ֆեյքը բավականին լավ տեղեկացված է, և կարող եմ հստակ ասել, որ իշխանությունները հիմա փորձում են լռեցնել հանրության ձայնը և իրական օրակարգերից հանրությանը շեղելը»,- ասաց Հրանտ-Մելիք Շահնազարյանը:
Քաղաքագետը նաև նշեց՝ Նիկոլ Փաշինյանը համագործակցում է ադրբեջանական կողմի հետ և այս կալանավորումներին ի պատասխան ստանում է տեղեկատվական աջակցություն:
«Կարծում եմ՝ պատճառները շատ պարզ են, որովհետև այս պահի դրությամբ Նիկոլ Փաշինյանը համագործակցում է Ադրբեջանի հետ և ունի գաղտնի պայմանավորվածություններ, տարածքներ են զիջում ադրբեջանցիներին և հնարավորություններ են բացում, որ Սյունիքում աշխատեն, դրա փոխարեն էլ տեղեկատվական աջակցություն են ստանում, և չեզոքացնում են այն մարդկանց, ովքեր խնդիր են առաջացնում թուրք-ադրբեջանական քաղաքականության համար մեր տարածաշրջանում»,- ասաց քաղաքագետը:
