Այսօր այնպիսի տպավորություն է, որ Հայաստանի ընդդիմության և Թուրքիայի դիմակայությունն է։ Պատմության մեջ առաջին անգամ Թուրքիան միջամտում է Հայաստանի ներքաղաքական իրավիճակին՝ որպես կողմ, գործող վարչապետի կողմ։ Այս մասին NEWS.am-ի հետ զրույցում ասաց քաղաքագետ Ստեփան Դանիելյանը։
«Չունենալով քաղաքական դաշտում մնալու որևէ հեռանկար, այս անձը շարունակում է հրաժարական չտալ։ Սա ես գնահատում եմ որպես պետական դավաճանություն», ասաց Դանիելյանը եւ իրավիճակի հանգուցալուծման մի քանի տարբերակներ նշեց․
«Լավագույն տարբերակը Նիկոլ Փաշինյանի հրաժարականն է։ Հաջորդ տարբերակը «Իմ քայլը» խմբակցությունից 20-30 պատգամավոր դուրս են գալիս ու մեծամասնությունը փլուզվում է, կառավարությունում ճգնաժամ է առաջանում։ Տարբերակներից մեկն էլ այն է, որ ԲՀԿ-ն ու ԼՀԿ-ն մանդատները վայր են դնում, խորհրդարանական ճգնաժամ է առաջանում, որի լուծումը Սահմանադրությամբ տրված չէ։ Այս ճգնաժամերի դեպքում էական է երկրի նախագահի խոսքը, և նա կարող է լուծումներ առաջարկել»։
Անդրադառնալով հարցին, թե ոստիկանությունը և ԱԱԾ-ն կմիանա՞ն Փաշինյանի հրաժարականը պահանջող ժողովրդական զանգվածներին ու ԳՇ-ի հայտարարությանը, քաղաքագետը նշեց, որ այս պահին դա արդեն էական էլ չէ, որովհետև նախ այդ կառույցներում բազմաթիվ սպաներ կան, որոնք չեն ողջունում իշխանության քաղաքականությունը, հետո էլ ԳՇ-ի հայտարարությունում հստակ ուղերձ կա, որ թույլ չեն տալու, որ ժողովրդի դեմ ուժ կիրառվի։
Այս 3 տարիների ընթացքում անընդհատ հնչող այն միտքը, թե ժողովուրդն է ամեն ինչ որոշելու, նաեւ մշտապես ժողովրդին վկայակոչելը, ըստ Դանիելյանի՝ նոր չէ․ «պատմությունը հուշում է, որ մեծագույն հանցագործությունները միշտ տեղի են ունեցել ժողովրդի անունից»։
