Նիկոլ Փաշինյանի մամուլի խոսնակ Մանե Գևորգյանը ինչպես երեկ, այնպես էլ այսօր ասաց, որ երեխաները իրենց ծառայությունը կշարունակեն նույն ընթացակարգով, ինչպես եղել է՝ որպես Արցախ զորակոչված զինակոչիկներ: Այս մասին կառավարության մոտ լրագրողների հետ զրույցում ասաց Արցախում ժամկետային զինծառայողի մայրը:
«Ասաց, որ քայլեր են ձեռնարկվում նրանց բուժզննումն ու սնունդը կարգավորելու ուղղությամբ: Մենք խնդրեցինք, որ ՊՆ-ից որևէ լիազորված անձ լինի, ի վերջո կան ռազմական հարցեր, ամեն ինչ չենք կարող Մանեից պահանջել: Մանեն մեզ խոստացավ, որ ՊՆ-ից կպահանջի որևէ անձի, ով մեզ հետ հանդիպում կանցկացնի: Անհանգստությունս կապված է նաև նրա հետ, որ իմ երեխան դիակների հավաքման գործողություններում մասնակցություն չունենա, նա հավաստիացրեց, որ զինվորները ազատված են դրանից: Մեզ խոստացան, որ պաշտպանության նախարարությունից որևէ պաշտոնյա մեզ հստակ պատասխաններ կտա, այն, ինչ պարտավոր է անել, եթե ինքը կերաշխավորի մեր երեխաների անվտանգությունը, թող մնան»,- ասաց զինծառայողի մայրը:
Նրա խոսքով՝ Փաշինյանի խոսնակն անդրադարձել է նաև նոյեմբերի 10-ին ստորագրված եռակողմ հայտարարության 4-րդ կետին, ըստ որի, հայկական ԶՈւ-երը պետք է դուրս գան հանձնված տարածքներից: «Մանե Գևորգյանը մեզ բացատրեց, որ 4-րդ կետի մեջ ներառված են այն շրջանների զինվորները, որոնք տրված են: Օրինակ՝ եթե իմ տղան ծառայում է Մարտակերտում, մնում է ու շարունակում ծառայությունը»,- նշեց նա:
Ինչ վերաբերում է զինծառայողների արձակուրդին, նա ասաց, որ Գևորգյանն ասել է՝ մոտակա մի քանի օրը պատրաստվում են կազմակերպել: