Թուրքիայում Ռուսաստանի դեսպան Ալեքսեյ Երխովը «Զվեզդա» հեռուստաալիքին հայտնել է, որ կրկին իրեն ուղղված վիրավորանքներ և սպառնալիքներ է ստացել:
«Անցյալ գիշեր և այս առավոտ ստացած վերջին սպառնալիքներից են՝ «Մենք ձեր զինվորների գանգերից երկնաքերներ կկառուցենք» և «Կվճարեք ձեր թափած յուրաքանչյուր կաթիլ արյան համար» և այլն»,- հաղորդել է դիվանագետը:
Երխովի խոսքով, նման հաղորդագրությունները չեն կարող լուրջ չընդունվել, բայց նրան ամենաքիչն անհանգստացնում է իր անվտանգությունը, քանի որ նա լավ պաշտպանված է: Միևնույն ժամանակ, դեսպանը կարևորել է Ռուսաստանի և Թուրքիայի ժողովուրդների միջև ատելության հրահրման կանխումը: «Նման մթնոլորտը կարող է հանգեցնել այն բանին, որ վտանգի տակ կհայտնվի ռուս-թուրքական հարաբերությունների ամբողջ շենքը»,- հավելել է նա:
Երխովն առաջին անգամ իր հասցեին ուղղված սպառնալիքների մասին զեկուցել է փետրվարի 13-ին, նշելով, որ դա պայմանավորված է Սիրիայում տեղի ունեցող իրադարձություններով, որտեղ վերջին շաբաթներին սիրիական բանակը, որին աջակցում է Ռուսաստանը, ակտիվորեն հարձակվում է թուրքամետ գրոհայինների դիրքերի վրա: Դիվանագիտական առաքելությունը հետագայում հայտնել է Անկարայում Ռուսաստանի դեսպանատան անվտանգության ամրապնդման մասին:
2016-ի դեկտեմբերին Թուրքիայի մայրաքաղաքում սպանվել է Անկարայում Ռուսաստանի այն ժամանակվա դեսպան Անդրեյ Կառլովը: Դիվանագետը սպանվել է նախկին ոստիկան Մևլութ Մերթ Ալթընթաշի կողմից: Այդ ժամանակ սիրիական բանակը, ռուսական ավիացիայի աջակցությամբ, Հալեպ նահանգում գրոհել էր ապստամբների դիրքերը:
