Բելառուսի մայրաքաղաք Մինսկում ընթացքի մեջ է երկրորդ Եվրոպական խաղերի մրցումային երրորդ օրը։ Այսօր պայքարի են դուրս եկել սամբիստները։
Հայաստանի ներկայացուցիչներից 74 կգ քաշային Արսեն Ղազարյանը սփոփիչ գոտեմարտում հաղթելու շնորհիվ բրոնզե մեդալի համար պայքարելու հնարավորություն է ստացել։
Արսեն Ղազարյանը պայքարը սկսեց 1/4 եզրափակչից, որտեղ 1-2 հաշվով պարտվեց Ռուսաստանի ներկայացուցիչ Ստանիսլավ Սկրայբինին ու սփոփիչ գոտեմարտի մասնակցելու հնարավորություն ստացավ։ Սփոփիչ գոտեմարտում Ղազարյանը 3-0 հաշվով հաղթեց ադրբեջանցի Աբդուլա Աբդուլաևին։
Այսպիսով, Արսեն Ղազարյանը կպայքարի բրոնզե մեդալի համար, մրցակիցը Հունաստանի ներկայացուցիչ Գեորգիոս Մարկարիանն է։
Հիշեցնենք, որ հունիսի 23-ին պայքարի դուրս եկած սամբիստներից Տիգրան Կիրակոսյանը (52 կգ) դուրս է եկել եզրափակիչ, իսկ 90 կգ քաշային Գրիգոր Սահակյանը պայքարելու է բրոնզե մեդալի համար։