Մարտի 21-ը Պոեզիայի համաշխարհային օրն է: Տոնն առաջին անգամ նշվել է Փարիզում, որտեղ գտնվում է ՅՈՒՆԵՍԿՕ-ի գլխավոր գրասենյակը։
Ընթերցանության, նախընտրած գրողների ու ստեղծագործությունների մասին Armday.am-ը զրուցել է Աժ նախկին փոխխոսնակ Էդուարդ Շարմազանովի հետ:
-Ընթերցասե՞ր եք, որքա՞ն հաճախ եք ժամանակ տրամադրում ընթերցանությանը:
-Այո, ընթերցասեր եմ, ես իմ օրն առանց ընթերցանության չեմ պատկերացնում: Հիմնականում քնելուց առաջ եմ կարդում:
-Այս պահին ի՞նչ եք ընթերցում:
-Այս պահին ընթերցում եմ Էդվարդ Նալբանդյանի հեղինակած գիրքը: Բավականին հաստ աշխատություն է, հետաքրքիր հարցազրույցներ, մեկնաբանություններ կան,և ,առհասարակ, տաս տարվա հայկական դիվանագիտության ձեռքբերումների, մարտահրավերների վերաբերյալ աշխատություն է:
-Վերջին գիրքը, որ ընթերցել եք:
-Ես միաժամանակ մի քանի գիրք եմ կարդում: Աշխատանքային սեղանիս այժմ դրված է Նալբանդյանի գիրքը և մասնագիտական գրքեր: Ես դասախոսում եմ համալսարանում և այժմ միջանկյալ քննություններ են, որի հետ կապված մասնագիտական գրքեր եմ կարդում նաև: Այս շրջանում ինձ հետաքրքրում են նաև այն մարդիկ, ովքեր փոխել են աշխարհը: Խորապես ուսումնասիրում եմ Անաստաս Միկոյանին, մարդ ում հաջողվել է կանխել Երրորդ աշխարհամարտը:
-Գիրք, որ միշտ Ձեզ հետ է:
-Աստվածաշունչը չհաշված՝ սեղանիս միշտ դրված է Գարեգին Նժդեհի «Հատընտիր»-ը և Գրիգոր Նարեկացու «Մատյան ողբերգություն»-ը:
-Ի՞նչ գիրք պետք է կարդա քաղաքական գործիչը:
-Վերջերս սկսել եմ կարդալ նաև Շահան Նաթալի «Թուրքերը և մենք» դասական աշխատությունը, որը քաղաքական գործիչը պետք է իմանա: Յուրաքանչյուր քաղաքական գործիչ պետք է Մովսես Խորենացու «Հայոց պատմություն»-ը կարդա:
-Ձեր սիրած գրողն ու ստեղծագործությունը:
-Սիրելի գրողներ շատ ունեմ. Կա Մեծարենց, կա Տերյան, բայց Թումանյանն է անհաս Արարատը մեր նոր քերթության: Կա Թումանյան, ով գագաթն է հայկական պոեզիայի, բայց եթե մի գիրք պիտի ինձ հետ վերցնեմ, որ գնամ լուսին, կամ ինչ-որ մի տեղ, բարդ է, բայց այս պահին սիրտս Չարենց ուզեց. «Ես իմ անուշ Հայաստանի». «գժանոց է»:
Այս շրջանում ինձ համար բացահայտել եմ, որ իմն է Համո Սահյանը, ով ահավոր հողեղեն, իսկական ու մեծ է: Ռուսական պոեզիայից Եսենինի երկրպագու լինելը քիչ է ասված:
-Կարո՞ղ ենք համարել , որ ընթերցանությունը Ձեր «թուլությունն» է:
-Այո, երաժշտությունը, գրականությունն ու սպորտը լավ իմաստով իմ թուլություններն են:
-Ի՞նչ խորհուրդ կտաք կարդալ:
-Տարբեր տարիքում տարբեր գրքեր կարելի է խորհուրդ տալ կարդալ: Փոքրերը թող հեքիաթներ կարդան, քաղաքական գործիչները՝ Դանթե, Դոստոյևսկի, Տոլստոյ, Հրանթ Մաթևոսյան, և այլն: Ինչքան էլ կարդանք ամբողջը չենք հասցնելու կարդալ: Կարևորը՝ ինչ էլ կարդանք հուս, հավատ ու սեր արթնացնի, այլ ոչ թե՝ նախանձ , չարություն և ատելություն:
-Գի՞րք,թե՞ ընթերցելու այլ տարբերակ եք նախընտրում:
-Հնարավորությունները շատ են. համացանց և այլն, սակայն ես կարդում եմ գրքից, ու նաև նոթատետր եմ պահում ու գրառումներ կատարեմ:
