Մինչև տարեվերջ Շիրակի մարզի Լուսաղբյուր գյուղը կունենա ջրամատակարարման նոր ցանց։ Ծրագիրը սուբվենցիոն է՝ ընդհանուր 72 միլիոն դրամ արժողության,որի 70 տոկոսը պետության ֆինանսական պարտավորությունն է ,իսկ 30 տոկոսը՝ համայնքինը: Լուսաղբյուրցիների համար մինչև հիմա ջրի հուսալի պաշարներն իրենց բակերում փորված ջրհորներն են ու մեկ էլ գյուղի միակ ինքնահոս աղբյուրը։
Միակ ու ամենամեծ աղբյուրը գյուղի ձորամերձ հատվածում է։100 տարուց ավելի է այն բնակիչների չցամաքող ջրի պաշարն է։ Խմելու, սառնորակ մաքուր ջուրը բխում է ընդերքից։Այն թեև անսպառ աղբյուր է,բայց գյուղացիները խնայողաբար են օգտագործում,նաև կուտակում են կենդանիների համար։
Գյուղի ընդերքը հարուստ է ջրային պաշարներով,այստեղից էլ գալիս է նաև գյուղի անվանումը:Տասնամյակներ առաջ ջրամատակարարման ցանց ունեցել են, բայց պոմպակայանով ջուրն հասել է միայն գյուղի մի մասին։ Հիմա այդ պոմպակայանն էլ,խողովակներն էլ չկան,թալանված է ամեն ինչ։Դրանից հետո, 90-ականներին, ստիպված բոլոր լուսաղբյուրցիները տնամերձներում ջրհորներ են փորել։
Կենցաղային հոգսերի, տնամերձները ոռոգելու համար օգտագործվող ջրհորները նաև ցամաքում են, հատկապես ամռանը։Ցամաքող ջրհորներին այլընտրանք գյուղը շուտով կունենա։Նոր կառուցվող համակարգով գյուղը կապահովվի խմելու ջրով։
