Վարչապետը Նիկոլ Փաշինյանը երեկ բավականին խաղաղ ձայնով, առանց զգացմունքայնության հայտարարեց, որ այս փուլում Լեռնային Ղարաբաղի հիմնախնդրի լուծման համար դիվանագիտական ճանապարհ չկա, Tert.am-ի հետ զրույցում անդրադառնալով Նիկոլ Փաշինյանի երեկվա հայտարարությանը՝ ասաց քաղաքական գիտությունների դոկտոր, ռազմական և ազգային անվտանգության հարցերով արցախցի փորձագետ, Հրաչյա Արզումանյանը։
«Լինելով ուժային կենտրոնների խիստ ճնշման տակ` նա շատ հանգիստ իրերն իրենց անուններով կոչեց, և ոչ թե մի բառով, որը անվանում են դիվանագիտություն»,- ասաց նա` նկատելով, որ շատ դժվար է դիմանալ եղած ճնշումներին:
Հրաչյա Արզումանյանի խոսքով` Հայաստանն ու նրա բարձրագույն քաղաքական ղեկավարությունը այս օրերին միջազգային կենտրոններին ցույց են տալիս համաձայնության գալու և իրենց ստանձնած պարտավորությունները կատարելու ունակությունը: Նրա դիտարկմամբ` չնայած մենք հիմա միայնակ ենք, բայց պետք է դուրս գանք իրավիճակից և խուճապի չմատնվենք:
«Հայաստանը՝ որպես պետություն, ցույց տվեց իր հասունությունը, և պատերազմից հետո շատերը կցանկանան ունենալ նման դաշնակից, որը գիտի, թե ինչպես պայքարել, իրականացնել ստանձնած պարտավորությունները»,- ասաց նա:
Ըստ նրա` մենք հիմա պարզապես կարիք ունենք ավարտել պատերազմը, հաջորդ անգամ ամեն առումներով մեզ համար անհամեմատ հեշտ է լինելու:
«Մեկ այլ կարևոր կետ ես կցանկանայի նշել, Հայաստանն ու հայ ժողովուրդը պետք է գիտակցեն, որ այլևս չկա Մոսկվայի պայմանագիր: Դա մի քիչ անսպասելի կթվա, բայց եթե մտածեք այդ մասին, դա ակնհայտ կդառնա: Այո՛, Էրդողանը Ռուսաստանին առաջարկում է նոր պայմանագիր կնքել, որն ամրագրում է Կովկասի նկատմամբ նրա իրավունքները, բայց գնացքն, ըստ էության, արդեն մեկնել է, և Կովկասը այլևս չի լինի միայն Ռուսաստանինը կամ Թուրքիայինը»,- ասաց նա:
Հրաչյա Արզումանյանը մատնանշեց պատմությունը, երբ Թուրքիան, գրավելով Կովկասը, ոչնչացրեց Ռուսաստանի հետ խաղաղության և գործընկերության պայմանագիրը: Հիմա էլ, ըստ նրա, մենք պետք է պայքարենք մեր նպատակների և մեզ համար, և այդ պայքարի հաջողությունը նաև բխելու է Ռուսաստանի և նրա ժողովրդի շահերից: «Բայց դա պարզապես զուգադիպություն է, ոչ ավելին»,- ասաց նա:
Հրաչյա Արզումանյանի խոսքով` հիմա պատերազմը երկուսի դեմ է` Հայաստանի և Ռուսաստանի:
«Էրդողանը կփորձի Ռուսաստանին ներքաշել պատերազմի մեջ, վերջին հայտարարությունը` հակամարտության մեջ մտնելու, արդեն բացեիբաց է արվում, և թուրքական զորքերի, ջիհադիստների, խորհրդատուների մասին ուղերձներն էլ ուղղված են ոչ թե Հայաստանին, այլ` Ռուսաստանին,- ասաց նա` հավելելով, որ Թուրքիան արդեն պատերազմի մեջ է մեզ հետ, և դա վիճարկման թեմա չէ,- բայց Հայաստանի և հայ ժողովրդի համար ավելի ընդունելի սցենար է, երբ Ռուսաստանը զերծ է մնում պատերազմում ուղղակիորեն ներգրավվելուց»:
