Երեւան քաղաքի առաջին ատյանի ընդհանուր իրավասության դատարանի Շենգավիթի նստավայրում, «Հայրենիք» կուսակցության խորհրդի անդամ Արսեն Բաբայանի, ՀՅԴ ներկայացուցիչ Լիլիթ Գալստյանի եւ ԲՀԿ ներկայացուցիչ Նաիրա Զոհրաբյանի կողմից ներկայացված բողոքների քննությունը հետաձգվեց՝ աշխատանքային ժամի ավարտի պատճառով։
Նշենք, որ նրանց փաստաբանը դեմ էր բողոքի քննության հետաձգմանը։ Նա պնդում էր, որ աշխատանքային ժամի ավարտին դեռ 40 րոպե կան, եւ, որ իրենք կհասցնեն ներկայացնել իրենց բողոքը։ Այնուամենայնիվ դատական նիստը հետաձգվեց եւ նշանակվեց նոյեմբերի 6-ին։
Փաստաբանը լրագրողների հետ զրույցում ասաց, որ դատարանն անհիմն մերժեց իրենց միջնորդությունը՝ դատական նիստը շարունակելու վերաբերյալ. «Մինչեւ բուն քննարկմանն անդրադառնալը անհրաժեշտ է նախ լսել բողոքի բովանդակությունը, որը բավականին ծավալուն է, 40 րոպեն բավական ժամանակահատված էր, որպեսզի կարողանայի ներկայացնել բողոքի բովանդակությունը»։
Նա նշեց, որ եթե հետագայում դատարանին ինքնաբացարկի հիմքեր լինեն, ապա կներկայացնեն։
«Քրեական գործի հարուցումը մերժելու մասին որոշումը անկհայտ ապօրինի որոշում է եւ դատարանին նյութերը չտրամադրելը գուցե ժամանակ շահելու համար է»,- ասաց նա։
Նշենք, որ դեռեւս հունիսի 30-ին «Հայրենիք»-ը, ԲՀԿ-ն եւ ՀՅԴ-ն իշխանության յուրացման եւ սահմանադրական կարգի տապալման դեպքերի առթիվ հանցագործության մասին հաղորդում էին ներկայացրել ՀՀ Հատուկ քննչական ծառայություն։ ՀՔԾ-ն, սակայն, մերժել էր քրեական գործի հարուցումը։
Հանցագործության մասին քաղաքական երեք ուժերի հաղորդման հիման վրա քրեական գործի հարուցումը մերժել էր նաեւ դատախազությունը, ինչին հաջորդել էր կուսակցությունների ներկայացուցիչների բողոքը առաջին ատյանի դատարան։
