Գագիկ Ծառուկյանի փաստաբանները Վճռաբեկ բողոք կներկայացնեն


Գագիկ Ծառուկյանի փաստաբանները Վճռաբեկ բողոք կներկայացնեն
Օգոստոս 9 14:30 2020

Գագիկ Ծառուկյանի փաստաբանները Վճռաբեկ բողոք կներկայացնեն: Այս մասին NEWS.am-ին հայտնեց փաստաբան  Էմին Խաչատրյանը` նշելով, որ իրենք բողոքարկում են այն, որ գործն ուղարկվել է առաջին ատյանի դատարան նոր քննության:

Նշենք, որ այս  գործով ՀՀ Վերաքննիչ քրեական դատարանը մերժել է փաստաբանների ներկայացրած բողոքը:

Նշենք, որ Դատախազությունը բողոքարկել էր Գագիկ Ծառուկյանի նկատմամբ որպես խափանման միջոց կալանավորումը ընտրելու միջնորդությունը մերժելու մասին առաջին ատյանի դատարանի որոշումը՝ Վերաքննիչ դատարանից պահանջելով բեկանել այն եւ կալանավորել Ծառուկյանին։ Այն բավարարվել էր մասնակիորեն:

Հիշեցնենք, որ Ծառուկյանի պաշտպանները մի քանի բողոք էին ներկայացրել Վերաքննիչ դատարան, որոնցից մեկը վերաբերում է հիմնավոր կասկածին։ Պաշտպանական թիմը գտնում է, որ դատարանին որեւէ ապացույց չկա ներկայացված, որը կհիմնավորի, որ Ծառուկյանն առնչություն ունի այդ քրեական գործի հետ։

Մյուս բողոքն էլ վերաբերում է վարույթի օրինականությանը, որ, ըստ պաշտպանների, ի սկզբանե այդ քրեական գործը պետք է քննվեր Հատուկ քննչական ծառայությունում, այլ  ոչ թե Ազգային անվտանգության ծառայությունում։

Հիշեցնենք, որ Գագիկ Ծառուկյանին մեղադրանք է առաջադրվել ՀՀ ՔՕ 154.2 հոդվածով (ընտրողի կողմից թեկնածուներից, կուսակցություններից (կուսակցությունների դաշինքներից), հանրաքվեի քարոզչական նախաձեռնություններից կաշառք ստանալը կամ թեկնածուների, կուսակցությունների (կուսակցությունների դաշինքների), հանրաքվեի քարոզչական նախաձեռնությունների կողմից ընտրողներին կաշառք տալը կամ ընտրողի ազատ կամքի իրականացմանը խոչընդոտելը): Նա իրեն առաջարված մեղադրանքը չի ընդունում եւ այն որակում է ապօրինի։



loading...