Վարչապետն ասաց բաներ, որոնք տարակուսանք են առաջացնում, կամ պարզապես սուտ են․ Անդրանիկ Թեւանյան


Վարչապետն ասաց բաներ, որոնք տարակուսանք են առաջացնում, կամ պարզապես սուտ են․ Անդրանիկ Թեւանյան
Հունիս 4 00:47 2020

Նիկոլ Փաշինյանն այսօր գերակտիվ էր ֆեյսբուքում։ Ինչպես միշտ։ Այս մասին Ֆեյսբուքի իր էջում «Կորոնավիրուսային հեղափոխություն» վերտառությամբ գրառման մեջ նշել է «Պոլիտէկոնոմիա» հետազոտական ինստիտուտի տնօրեն Անդրանիկ Թեւանյանը։

«Անգամ վարակվելու և ինքնամեկուսանալու պայմաններում։ Անգամ վարակված վիճակում կառավարության անդամների հետ շփվելիս։ Օրվա վերջում էլ ճեպազրույց ունեցավ և ասաց բաներ, որոնք տարակուսանք են առաջացնում, կամ պարզապես սուտ են», գրել է Ա․Թեւանյանը եւ հիշեցրել վարչապետ Նիկոլ Փաշինյանի խոսքերը․

«Այն մարդիկ, որոնք նախորդ տարի մահացել են բազմաթիվ այլ պատճառներից, այս տարի մահացել են կորոնավիրուսից»։

«Հարց է առաջանում՝ խոսքը նո՞ւյն մարդկանց մասին է։ Հեղափոխությունը «կրկնակի մահացածներ» հասկացությո՞ւն է մտցնում վիճակագրության մեջ։ Կխնդրեմ թարգմանել», նշել է Ա․Թեւանյանը։

․ ․ ․

«2020–ի առաջին 6 ամիսների տվյալներով ՀՀ-ում ավելի քիչ մահ է գրանցվել, քան 2019 թվականին։ Ավելին ասեմ՝ 2020թ․ մայիսին 320-ով պակաս մահ է գրանցվել ՀՀ-ում (չի նշվում, թե ինչի համեմատ է 320-ով պակաս–Ա․Թ․)։ ․․․ Ինչո՞ւ են այս տարի ավելի քիչ մահացել։ Որովհետև կորոնավիրուսի բերումով շատ ավելի մեծ թվով մարդիկ են ստացել առողջապահական ծառայություններ։ Կորոնավիրուսի բերումով նաև շատ մարդիկ հոսպիտալացվել են ու բուժվել են ոչ միայն կորոնավիրուսից, այլ նաև հարակից հիվանդություններից։ ․․․ Հունիսի 1–ի դրությամբ 357 մահ պակաս ունենք, քան նախորդ տարի»,– ասել է վարչապետը։

«Նրա այս հայտարարության մասով մի քանի դիտարկում՝

1․Այս տարվա 6 ամսվա տվյալներն օբյեկտիվորեն չեն կարող լինել, քանզի մենք 6-րդ ամսի մեջ ենք և հետևաբար՝ առաջին վեց ամսվա վիճակագրություն այս պահին բնության մեջ չի կարող գոյություն ունենալ։

Խոսքի մեջ գոնե մի փոքր օբյեկտիվ ճշմարտություն պետք է լինի, որ սուտն անցնի։ Հակառակ դեպքում ստանում ենք «թավշյա» վիճակագրություն։

2․Մահերի վիճակագրության ամենաթարմ տվյալը պաշտոնապես հրապարակված է միայն հունվար-մարտ ամսիների համար (տե՛ս մեկնաբանությունում տեղադրված հղումը)։ Ըստ այդմ՝ 2018-ի առաջին 3 ամիսներին, այսինքն՝ երբ դեռ հեղափոխություն չէր եղել, գրանցվել է 7128 մահ։

2019–ի հունվար-մարտին, այսինքն՝ երբ Փաշինյանն արդեն ուներ գրեթե 100-տոկոսանոց իշխանություն օրենսդիր, գործադիր և դատական համակարգերում, Հայաստանում մահացել է 7307 մարդ։ 2018-ի համեմատ 179-ով ավելի։

Այս տարվա առաջին երեք ամսում մահացել է 7289 մարդ։ Դա նախորդ տարվա նույն ժամանակահատվածի համեմատ 18-ով պակաս է, բայց մինչհեղափոխական Հայաստանի համեմատ 161-ով ավելի։

Կրկնեմ, սրանք պաշտոնական թվեր են։ Այլ թվեր չկան հրապարակված։ Թե որտեղի՞ց է վարչապետը վերցնում թվերն ու իր ուզած ձևով մեկնաբանում դրանք, միայն ինքը կիմանա։

3․ Վարչապետի ասելով ստացվում է, որ կորոնավիրուսը դարձել է հնարավորություն մեր քաղաքացիների համար՝ այլ հարակից հիվանդություններից բուժվելու և քիչ մահանալու համար։

Կարո՞ղ ենք սա որպես գովազդ ընդունել՝ «Վարակվի՛ր և բուժվի՛ր» կարգախոսի շրջանակներում, թե՞ սա գրանցվող մահերի ողբերգական ցուցանիշները «սվաղելու» և թվային մանիպուլյացիաներով սեփական ապաշնորհությունը թաքցնելու անհաջող փորձ է։ Միգուցե երկուսը միասի՞ն», գրել է Անդրանիկ Թեւանյանը եւ ամփոփել․

«Սա՞ է «Կորոնավիրուսային հեղափոխության» բուն էությունը։ Երբ մեղավոր է անպատասխանատու քաղաքացին, իսկ կառավարությունն ու վարչապետն էլ մեղավոր են այնքանով, որքանով այդ անպատասխանատու քաղաքացու ընտրությունն են»։

 



loading...