ԱԺ «Իմ քայլը» խմբակցության ղեկավար Լիլիթ Մակունցն այսօր խորհրդարանում լրագրողների հետ հանդիպմանն անդրադառնալով հարցին, թե ինչու ՀՀ վարչապետ Նիկոլ Փաշինյանը չի մասնակցել ԱԱԾ նախկին ղեկավար Գեորգի Կուտոյանի հոգեհանգստին և հուղարկավորությանը, նախ՝ իր ցավակցությունները հայտնեց Կուտոյանների ընտանիքին, ապա պատասխանեց.
«Իսկապես շատ սարսափելի բան է տեղի ունեցել, որից ազդվել ենք բոլորս: Ինչ վերաբերում է վարչապետին, ապա նա ցավակցական խոսք հղել է Կուտոյանների ընտանիքին, և իշխանության առանձին ներկայացուցիչներ ներկա են եղել հրաժեշտի արարողությանը: Իսկ այն անձինք, այդ թվում՝ վարչապետը, որոնք չեն մասնակցել, չեմ կարծում, որ դա կարող է դառնալ շահարկման առարկա»:
«Չեմ կարծում, որ վարչապետի կողմից Գեորգի Կուտոյանի հուղարկավորությանը չմասնակցելը կարող է շահարկման առարկա դառնալ»:
Մակունցը նաև դժվարացավ ասել, թե Կուտոյանի հուղարկավորությանն իրենց խմբակցությունից ովքել են մասնակցել.
«Անձամբ ես չեմ կարող մասնակցել, քանի որ պետք է ներկա լինեմ նիստերին»,- շեշտեց նա:
Նա նաև ընդգծեց, որ իր համար անընդունելի է ցանկացած շահարկում կամ ատելության խոսք։
«Բոլորը պետք է զսպվածություն ցուցաբերեն։ Յուրաքանչյուրս ունենք մեր պատասխանատվության մասնաբաժինը, որպեսզի լինի այնպիսի մթնոլորտ, որտեղ կլինի աշխատանքային բովանդակություն: Բոլորը պետք է զսպվածություն ցուցաբերեն ոչ միայն այս դեպքին, այլև առհասարակ»,- եզրափակեց նա:
Մանրամասները՝ 168.am-ի տեսանյութում
