Հայաստանի Հանրապետական կուսակցության շտաբի աշխատակիցները լուրջ ուսումնասիրել են «Իրազեկ քաղաքացիներ միավորում» ՀԿ-ի հրապարակած ձայնագրությունները։ Այս մասին լրագրողների հետ զրույցում ասել է ՀՀ ազգային ժողովի փոխնախագահ Հերմինե Նաղդալյանը։ Նա նշել է, որ չի լսել ձայնագրությունները:
«Իմ գործընկերները լուրջ ուսումնասիրել են այդ ձայնագրությունները և արդեն համապատասխան հայտարարությունը տարածել են։ Քաղաքական ուժերը, ովքեր լուրջ մասնակցում են ընտրություններին, բնականաբար որոշակի կազմակերպչական աշխատանք կատարում են՝ կողմնակիցներ, թվաքական, կոնտակտներ և այլն։ Այս ամենը մեկ բառով կարելի է անվանել ցուցակագրում։ Այդ բառը ասելիս անմիջապես պատկերացնում ենք վարչական ռեսուրսի չարաշահում, բայց առաջին հերթին դա կազմակերպչական աշխատանք է, որը կատարում են բոլոր քաղաքական ուժերը»,- ասել է Նաղդալյանը։
Նրա պնդմամբ՝ նախկին հնարավորությունները՝ վարչական ռեսուրս օգտագործել, մարդուն ստիպել քվեարկել այսպես կամ այնպես, քվեաթերթիկը դուրս հանելը, նկարելը, ապացուցելը վերացել է նոր ընտրական օրենսգրքի հիման վրա։
Նա շեշտել է, որ որևէ տնօրեն՝ լինի դպրոցի, թե մանկապարտեզի, եթե ցանկանա «արջի ծառայություն» մատուցել, գործընթացը վերահսկել հնարավոր չէ։
«Որևէ մեկը չի կարող ստուգել և համոզվել, թե ինչպես ընտրեցիք։ Ընտրությունը չի կարող նկարահանվել։ Այս տարվա ընտրական փոփոխությունների շնորհիվ ոչ մի քաղաքական ուժ չի կարող վերահսկել, ար դյոք այն անձը ում նա ընտրակաշառք է տվել հենց իր օգտին է քվեարկել, թե ոչ։ Եթե ուզում են իրենց գումարները ջուրը գցել, ապա կարող են շարունակել բաժանել կաշառքները, միևնույնն է, վերահսկում իրականացնելն անհնար է»,- ասել է նա: